MPL Under 18 Police-in Aizawl FC an ngam
Mizoram Premier League Under 18-ah Mizoram Police-in semifinal lut chiang tawh mah se Aizawl FC chungah zahngaihna lantir loin 3-1 in an hneh a, I League club hian knockout stage an thleng pha lo - an aiah Chhinga Vengin semifinal an lut thung.
Semifinal hi November 23, Ninganiah khelh tur a ni a, chawhma dar 11:00-ah Bethlehem Vengthlang FC leh Chhinga Veng FC te an inkhel ang a, chawhnu dar 1:30-ah Mizoram Police FC leh Dinthar FC te an inkhel zui ang.
Inkhel chu
Thawhṭanni zan Lammual inkhelah Aizawl FC tan semifinal lut turin chak a ngai a, amaherawhchu Police nena an inkhelh
ṭum hian first half-ah goal a lut lo.
Second half-ah Police-in Lalruatfela hmangin minute 59-naah hma an hruai a, AFC-in semifinal thleng tura an mamawh zat chu goal hnihah a pung chho.
Aizawl FC beseina siam turin Isaac Zoremsanga'n minute 66-naah an si phurh a sut a; amaherawhchu Police lamin Lalmuankima hmangin minute 74-naah hma an hruai nawn a, minute 83-naah Lalruatfela'n a goal a khung belh bawk.
Engtin zel?
MPL club zinga naupang zirtirna kalpui mumal bera ngaih Aizawl FC-in MPL Under 18 season ruk chhungin nomawi an la chawi lo a, tun season-ah phei chuan semifinal an lut pha lo.
AFC-in inenfiah an mamawh a, MPL Under 18 nomawi hi an club nomawi dah khawmna timawi thei tur zinga mi a ni.
Senior team inelnaah Aizawl FC-in Police bawk an hmachhawn dawn a, an junior team tan phuba an laksak thei ang em tih chu zawhna chhan har tak a ni.
Police hian coach thar Lalbiaksanga Colney hnuaiah Aizawl FC hi Lungleiah an draw a, semifinal-ah pawh rinkai zawk tia sawi tur an awm lo.
November 13, ThawhṬanni Result
Mizoram Police 3 - 1 Aizawl FC
MPFC : Lalruatfela 59', 83'; Lalmuankima 74'
AFC : Isaac Zoremsanga 66'
Semifinal - November 23, Ningani
11:00 AM Bethlehem VT vs Chhinga Veng FC
01:30 PM Mizoram Police FC vs Dinthar FC
Team Dinhmun
# Team Pld W D L GF GA GD Pts
1 Bethlehem Vengthlang 7 5 2 0 19 9 10 17
2 Mizoram Police FC 7 5 0 2 19 10 9 15
3 Dinthar FC 7 4 1 2 12 15 -3 13
4 Chhinga Veng FC 7 4 0 3 22 7 15 12
5 Aizawl FC 7 3 1 3 15 9 6 10
6 Chanmari FC 7 3 0 4 13 12 1 9
7 Ramhlun North FC 7 1 0 6 10 23 -13 3
8 Chanmari West FC 7 1 0 6 7 32 -25 3