Juventus mikhual tur Barcelona
Zanin dar 1:15 hian Juventus-in UEFA Champions League-ah Spanish club lian Barcelona an mikhual dawn. Group D inkhel dangah Sporting CP leh Olympiakos Piraeus te an inkhel dawn a, inkhel pawimawh vek a ni.
Team dinmun
Barcelona-in an match hmasa berah Juventus 3-0 in an sawp a, an match hnuhnung berah Olympiakos and draw tih loh chu an la chak vek. Catalan club hian point 10 hmu tawhin knockout stage lut turin point khat bak an mamawh tawh lo a, point hmuh kher pawh a ṭul tawh lo thei bawk.
Juventus-in Barca an hneh tawh loh bakah khualmualah Sporting an draw a, point sarih hmu tawhin knockout stage lut turin point thum tal hmuh a la ngai a, zanina an chak lo a nih chuan an dinhmun a derthawng thei ang.
Sporting CP leh Olympiakos Piraeus te hian a nihna takah chuan Europa League khel tur an zawng a ni ber a, Greek club Olympiakos tan pathumna dinhmun hauh turin chak ngei ngei a ṭul.
Zan chinchhiahtlak
Juventus-in keeper langsar Gianluigi Buffon an kawl a, Barca-in Andres Iniesta an nei thung. Zanin hi football legend pahnih te khelmuala an intawn hnuhnun ber a ni thei a, hei vang hian zanin inkhel hlutna hi a sang sawt.
Kum 39 mi Buffon hian football-a nomawi chawi theih chu FIFA World Cup thlengin a chawi tawh a, amaherawhchu Champions League nomawi a la chawi ngai lo. Juventus hi hrem vangin Serie A aṭanga an tlak hnuah pawh Gigi hian a club hi a chhuahsan duh lo a, Italian keeper hi a rinawm vangin fak a hlawh.
Season liam ta khan Buffon hian Juve hi Champions League final hial thlenpui mah se ṭum dang zawng aiin nomawi a hmu hnai a, kumin hi a hun hnuhnung a ni tawh. Italy-in World Cup an khelh dawn loh bawk avangin Buffon tan chuan Champions League hi a pawimawh a, Barcelona nena an inkhel tur hi ngaihthah a thiang lo.
Spanish midfielder Andres Iniesta thiamzia hmuh hmaih theih a ni lo a, Lionel Messi te nen an hun a inan avangin a thiamna angin khawvelin an hmelhriat ta lo thung. Iniesta hian nomawi liantham chawi theih zawng zawng a chawi vek tawh a, kum 33 mi ni tawh mah se Barcelona game timawitu a la ni.
Inkhel tur chu
Barcelona-in an match hnuhnung berah Leganes 3-0 in an hneh a, Juventus an hmachhawn hnuhnung berah 3-0 in an chak a, amaherawhchu zanina an inkhelhna tur Turin-a an inkhelh hnuhnun berah erawh 3-0 in an tlawm thung.
Catalan club hian inkhel bul ṭan turin Lionel Messi leh Luis Suarez te an hman a rinawm a, player langsar pahnih hian an record tih ṭhat a pawimawh. Tun season-ah Messi hian Champions League-ah khualmualah goal a la khung lo a, Suarez hian March thla hnuah Europe-a inelna ngaihhlutah hian goal a la khung lo bawk.
Juventus hian an match hnuhnung berah Sampdoria chu 3-2 in an hneh lo a, league-ah pawh hmahruaitu Napoli an phak lohna chu point li a tling tawh. Amaherawhchu Massimiliano Allegri hian Juve hi season thum chhungin ṭum hnih final a luhpui a, Argentine forward ṭha pahnih Gonzalo Higuain leh Paulo Dybala te a kawl bawk avangin Catalan club aia dah hniam nghal a fuh lo ang.