Newcastle an lei duh

British sumdawng hausa Amanda Staveley kaihhruai financial firm PCP Capital Partners chuan Newcastle United lei an duh thu an tichiang a, Magpies lei an ngamna zat hi pound maktaduai 300 a ni. Newcastle hian hemi chungchangah hian thuchhuah an la siam lo a, dawr an nihna ang zat an puan erawh an pha thung.

Newcastle United neitu Mike Ashley chuan St. James' Park-ah kum 10 chhung neitu nih­na a chelh hnuah a club hi hralh a duh thu a puang a, tun hmaa pound maktaduai 380-a hralh a phal club hi kum tawp lamah hralh a duh avangin a aia tlawmin a phal tawh.

Kum 53 mi Ashley hian kum 2007 khan Newcastle United hi a lei a, pound maktaduai 134.4 a seng. An sum lakluh chungchang an puan hnuhnung bera a lan danin £900,000 an hlep a, 2015-16 chhunga an sum lakluh chu pound maktaduai 126-a ni.

Magpies lei tuma hmalatu zinga an hotunu Amanda Staveley hian kum 2009-a Sheikh Mansour bin-Zayed bin Sultan Al Nahyan-a'n Manchester City a lei khan a lo pui tawh a, kum 2008-a Dubai International Capital-in pound maktaduai 400-a Liverpool lei an tum khan a lo pui tawh bawk.

Newcastle hi Ashley-a neitu nihna hnuaiah vawi hnih ngawt Premier League aṭangin an rele­gate tawh a, fan-te nen an inkar boruak a ṭhat theih meuh loh avangin Mag­pies hi hralh a tum a ni.