Neymar-a'n penalty a pet ang - Cavani
Paris Saint-Germain-in season ṭan tira titi an luahna ber chu an khelh ṭhat leh result duhawm lam ni loin an player pawimawh pahnih Edinson Cavani leh Neymar ten penalty an inchuh chungchang a ni.
Player pahnih an ngawi reng a, hemi chungchangah hian titi lengvak pawh a tam hle. Mahse, Uruguayan striker Cavani a ṭawng chhuak a, PSG tan tun season-a match 17 a khelha goal 19 khungtu striker chuan, "Neymar -a'n penalty a pet ang, hei hi coach thutlukna chu a ni," tiin Unai Emery-a'n match 13-a khelha goal 11 khungtu Neymar-a chungah rinna a nghah thu a sawi.
PSG hian zanin dar 1:15-ah Champions League group stage match khel turin Celtic an mikhual dawn a, last 16 lut chiang tawh mah se Bayern Munich nen group hmahruaitu nih an inchuh avangin an tlawm a thiang dawn chuang lo.
French club hian match li an khelh tawhah hnehna chang vekin goal 17 an khung a, group stage-a goal chhuah lo awmchhun an ni mek. Hetihlai hian match lia vawi khat chiah chak hmel la hmu Celtic tan inthlahdah a thiang bik lo a, Europa League round of 32 khel turin pathumna an nih a ṭul - an mikhualna ramah chak an tum ang.
Group B inkhel dangah Bayern Munich chuan zan dar 1:15-ah vek Anderlecht an lenchilh dawn bawk a, an match hnuhnung bera PSG hmachhawn tur Bayern hian French club an hmachhawn huna group hmahruaitu nihna chhuhsak theih turin zanina chak hi an ngai pawimawh dawn.