Brighton an kal zel

Premier League kai thar Brighton & Hove Albion chuan a zawnin league match nga chhung hneh loh tawng loin an kaltluang ta. Thawhṭanni zan inkhelah Chris Hughton-a naute hi an mikhual Stoke City nen 2-2 a inhnehtawkin point khat ve ve an insem.

Amex-a inkhelah mikhual Stoke tan Eric Maxim Choupo-Moting chuan Swiss international midfielder Xherdan Shaqiri pass ṭha zet chu goal-ah chantirin a team hma a hruai pui.

Brighton lamin chawlhlawk hma deuhin Pascal Gross hmangin an si phurh sut mah se Chelsea defender hlui Kurt Zouma chuan second 120 hnu lekah a tauh lut a, a vawi hnih nan Stoke-in hma an hruai. Inkhel chawhnu lamah Jose Izquierdo-a'n an siphurh sutna goal khungin goal dang a luh belh tawh lo.

Brighton hian point 16 hmuin league table-ah pakuana dinhmun an luah a, October thla tira Arsenal an tlawh chinah league match bikah chuan an la tlawm leh lo, hetih lai hian Stoke erawh 15-naah an awm chhunzawm.

Brighton manager Chris Hughton chuan, "Vawi hnih a hnufual zawk kan nih hnuah kan tho leh thei, inhnehtawk kha result awm tak a ni. Goal hnih chhuah hnua insiamṭhat theih hi a awlsam lo a, huaisen taka kan beih let vangin point kan hmu," tiin a sawi.

Stoke City boss Mark Hughes chuan, "Brighton khan min chhaih buai tam lo, hun

ṭha an neih ṭum hnih an chhawr ṭangkai nghal thei kha chu kei mahni lam thiam loh a ni. Inkhel thunun viau mah ila, a pawimawh hun taka ball ṭha kan pet chhuak thei ṭhin lo kha kan tuar a ni," tiin hun ṭha an bawhpelh thu a sawi.

Brighton hian Inrinni zanah Jose Mourinho kaihhruai Manchester United chu Old Trafford-ah an lenchilh dawn a, Stoke hian table mawngphaha awm Crystal Palace an hmachhawn thung ang.