Hliam vangin Haye inhnukdawk

David Haye chuan amah ang thoa British boxer Tony Bellew chu December 17-ah hmachhawn tum mah se a training-na lamah a inhliam avangin a inhnuhdawh a ngai a, nakkum March 24 emaw May 5-ah an inhnek ang.

Boxer pahnih hi March thla khan an lo inhmachhawn tawh a, WBC cruiserweight champion Bellew hian round 11-naah Haye hi a tukdawl. Boxer pahnih hi inhmachhawn nawn tura tih an ni a, 02 Arena-a an inhnek tur ticket hi hralh zawh vek tawh ni mah se world heavyweight champion hlui Haye inhliam vangin sawn hlat mai a ngai leh ta a ni.

Haye chuan, "Vawi 100 chuang ka tih tawha ka la inhliam ngai miah lohna step-ah tlana exercise ka lak laiin ka ke chheh a sual palh a, ka inhliam ta a ni. Step-a ka lum loh nan a vawn banah ka in vuan hman a, mah se hei vang hian ka ban puamah hliam ka tawrh phah thung," tiin a sawi.

Kum 37 mi boxer chuan sawi chhunzawmin, "Uluk taka ka doctor leh physiotherapist ten min enfiah hnuah kar hnih hnuah chuan gym ka kal leh theih tawh mai an beisei. Tony-a leh a chhungte, a training team leh kan fan-te zawng zawng chungah ngaihdam ka dil a ni," tiin Bellew nena an inhnek tur sawn a ngai chu pawi a ti hle.