ATK tan Salt Lake hawh man a to

West Bengal sorkar chuan East Bengal leh Mohun Bagan chu Salt Lake Stadium-a thlawna an hawh an phal sak dawn a, hetihlai hian Indian Super League club Atletico de Kolkata erawhin stadium hawh manah hian match khatah nuai 16 an chawi a ngai dawn thung!

East Bengal leh Mohun Bagan hian sum an seng lo dawn tawp tihna erawh a ni lo. Salt Lake Stadium an hman apiangin inkhelh zawha a hmun hma tih fai nan Rs. 150,000 an chawi ṭhin ang. ATK-in nuai 16 an chawi tur erawh nuai li hi hoarding tar leh senghawina man atan an chawi a ngai ang a, nuai 12 hi Salt Lake hman man hrim hrima an chawi tur a ni thung ang.

Hetihlai hian East Bengal leh Mohun Bagan-te hi club inhal tak an nih avangin sorkar a fimkhur tho a, buaina chhuah avanga stadium-ah thil tih chhiat a awm a nih chuan club ten nuai 10 an chawi ang a, kum khat chhung Salt Lake Stadium an hawh thei lo bawk ang - I League club pahnih hian security atan nuai nga an deposit a, ATK-in nuai 10 an deposit thung.

Stadium hi ni thum dan zelah hman theih chauh tura tih a nih bawk avangin Kolkata club te hian an home match ṭhenkhat chu fixture avangin Salt Lake ni lo stadium dangah an khelh a ngai dawn a ni.

I League club pahnihin duhsak an hlawh chhan hi tun hnaiah Kolkata-a football ngainatu tam takin ATK an do vang nia sawi a ni a, West Bengal sorkara sports minister ni lai Arup Biswas hi Mohun Bagan vice president hlui a ni bawk.