West Brom-in Pulis an ban

Premier League club West Brom chuan an manager Tony Pulis chu a hna aṭangin an ban. Pulis kaihhruaina hnuaiah tun hnaiah match 10 chhung chak ni hmel an hmu tawh lo a, relegation zone-a awm West Ham (9 pts) aiin point khat chiahin an hmu tam.

Baggies hian season bul an ṭan fuh hle, an league match hmasa pathumah hnehna an chang vek. Mahse, August 22 khan League Cup-ah Accrington an hneh lo a, hemi hnu hian hmalam an pan leh tawh lo.

West Brom manager ni tawh ṭhin, Pulis hnuaia assistant manager ni bawk Gary Megson chuan club enkawl hna hi a thawk lailawk ang. Megson hian a hna hmasa atan Inrinni zan hian North London derby-a chak lo hlim Tottenham a lenchilh dawn a ni.

Welsh manager Pulis chuan, "Club-in nghelnghet taka hma a sawn ka duh a, result ṭha nei chunga sum leh pai dinhmun sawhnghet kha ka thupui a ni a, chhawm nung tur pawhin ka duh. Season duhawm tak kan hman hnuah kan beisei loh anga thil a thleng hi pawi ka ti hle," tiin a sawi.

Kum 59 mi Pulis hian season hmasa khan West Brom hi Premier League-ah 10-na a nih pui a, English manager zingah ani aia club te point hmuh hnem pui an awm lo, tun season-ah erawh match 12 aṭangin point 10 chiah an la hlawh chhuak.

Kar hmasa lawk khan Euro 2016-a Welsh inlan puitu Chris Coleman a bang a, Pulis hi an ram team enkawl thei tur anga sawi zawm nghal a ni.