Eli tan title hmasa ber

Nulaihawl huangah pawh champion thar a awm, a hming chu Elizabeth Rohlupuii a ni. Melriat nula hian Lunglei wrestler Zodinpuii hnehin, a vawi khat nan Mizo inchai title fight-ah hnehna a chang.

Round khatna lekah Melriat nula Eli hian a khingpui a chawikang a, round nga an inbeih chhungin a chungnung zawk. Eli chuan, "Medal tam tak ka la ve tawh a, tun ṭuma mi chu Mizo inchai title fight a nih avangin a hlu bik hle," tiin Vanglaini a hrilh.

Elizabeth Rohlupuii hian 2020 Khelo India-ah khan silver medal a lo la tawh. SAI NCOE Lucknow-a training nei lai a ni a, tun ṭum inchai hmachhawn tur hian Mizoramah a rawn haw a, a tum ang ngeiin hlawhtlinna a chang.