NE Olympic Football-ah Mizoramin GOLD an la
Mizoram chuan 2nd NorthEast Olympic Football-ah inelna thlengtu Meghalaya chu final-ah 2-1 in an hneh a, gold medal an hlawh chhuak. Coach HC Zarzoliana'n a record duhawm tak a chhunzawm zel a, kum bithliah inelna aṭanga veteran football thlengin nomawi a chawi tawh a ni.
Mizoram forward Joseph Lalvenhima chuan goal nga khungin top scorer a ni a, goalkeeper John Lalruatfela chuan golden glove chawimawina a dawng - Dinthar tlangval hian goal hnih chiah a chhuah. Player of the tournament-ah erawh inelna thlengtu Meghalaya winger Figo Syndai an thlang thung.
Final hmuhnawm
TRC Ground, Polo-ah entu an ṭhahnem a, Meghalaya-in ṭantu an nghah a, Mizoram ṭantu pawh an tlem chhe lo. Entu an tam ang ngeiin inkhel pawh a hmuhnawm a, goal chance a tam bakah team pahnih an intluk tawk hle.
Mualneitu lamin chance ṭha nei hmasa a, captain Figo Syndai chuan hnai tak aṭangin a hlah. Mizoram pawhin veilam aṭanga Mapuia leh Joseph Lalvenhima te cross hmangin chance a nei a, keeper Rajat Lyndoh tan hna an siam lo.
Meghalaya erawhin freekick aṭangin ṭha zetin an pet a, keeper John Lalruatfela'n ṭha takin a dang. First half-ah goal a lut lo a, second half-ah pawh mualneitu bawkin chance an nei hmasa. Meghalaya forward Nelson Rymbai chuan keeper chauh a hmachhawn hnuah goal-ah pet mah se John-a'n a dansak.
Mizoram hun a thleng a, Hnahthial tlangval Mapuia chuan Meghalaya player pahnih kap karah a pet lut a, keeper Rajat-a'n goalline a pel lai hi a thlir liam. Goal hmahruai hi a mawi danglam hle.
Meghalaya goal bawh a na a, keeper John-a'n hna a ngah hle. Mizoramin hahdam zawka an awm theih nan Sihphir Venghlun tlangval Malsawmtluanga'n box chhunga a ball hmuh chu vir puiin chiang zetin a pet goal.
Nuam sa takin Mizoram an champion dawn emaw tih hnuah final-a khel ṭha bera chhal theh keeper John a chesual a, ball a thlauh chu Jeremy hmangin Meghalaya-in minute 87-naah siphurh an sut ṭhen. Hun tawp thlengin mualneitu hian an nawr bet a, captain Lalhrezuala leh Laldanmawia te hoin Mizoram an ṭangtluan.
Ṭawngṭai chhuah
Mizoram manager K. Lalenghluna chuan, "Kan khingpui Meghalaya player-te hi kum nga bawr vel Shillong Lajong-a khel ho tawh an ni a, an ṭha tih kan hria. Chuvangin counter attack-a vuak let kha kan tih theih a ni a, kan tumah kan chiang hle.
"Inbuatsaih hun kan ngah tawh tawk lo a, player erawh kan nei ṭha. Kan naute discipline hi a ṭha em em a, inelna pumpuia discipline ṭha ber thlang se kan la thei hial ang. Gold medal kan lak theih nan kan dil a, kan ṭawngṭai nasa a, kan ṭawngṭai chhuah a ni," tiin Vanglaini a hrilh.
Hmeichhe tan Bronze
Mizoram hian kum 21 inelna mipa football-a gold an lak bakah kum 17 hnuai lam inelna hmeichhe football-ah bronze an la bawk. Coach Lalrintluanga (Saitea) kaihhruai Mizoram hmeichhe team hian semifinal-ah Manipur hneh lo mah se bronze medal inchuhnaah Sikkim 3-1 in an hneh.
Mizoram tan Hnahthial tleirawl Lalrinmawii'n goal hnih a khung a, Armed Veng South tleirawl Gladys Zonunsangi'n goal khat a khung bawk.
Gold Medal Kalkawng
Group Stage
November 9, Nilaini
Mizoram 6 - 0 Assam
MIZ : Joseph Lalvenhima 18', 25', 37', 62'; K. Lalrosanga 47'; Rohlupuia 51'
November 11, Zirtawpni
Mizoram 1 - 0 Manipur
MIZ : Rohlupuia 50'
Semifinal - November 9, Nilaini
Mizoram 3 - 1 Nagaland
MIZ : Joseph Lalvenhima 22'; Aron Vanlalrinchhana 39'; Rohlupuia 51'
NAG : Pursun 11'
Final - Nimin Inkhel Result
Mizoram 1 - 2 Meghalaya
MIZ : Rohlupuia 55'; Malsawmtluanga 79'
MEG : Jeremy 87'
Mizoram Under 21 Mipa Team
GOALKEEPERS
1 John Lalruatfela Dinthar
2 H. Lalrinzuala Kolasib
DEFENDERS
3 Jeremy Zohminghlua Lengpui
4 Gilbert Lalbiaksanga Zemabawk
5 S. Lalhrezuala Lunglei
6 Malsawmtluanga Zemabawk North
7 T. Lalmuanawma Lawngtlai
8 Laldanmawia Ramlaitui
9 Lalmuanpuia Lengpui
MIDFIELDERS
10 Crespo Vanlalhriatpuia Sialhawk
11 Samuel K. Vanlalpeka Ramhlun South
12 Gratus Lalhnehliana Bualpui Ng
13 Aron Vanlalrinchhana Cherhlun/Republic
14 Caleb Lalnunhlua Ramhlun South
FORWARD :
15 Malsawmtluanga Sihphir Venghlun
16 K. Lalrosanga Lunglei/Ramhlun N
17 Augustine Lalrochana Vairengte
18 Rohlupuia Hnahthial
19 Joseph Lalvenhima Lunglei
Coach HC Zarzoliana, Ramhlun South
Team Officials Hmingthansanga, MFA
Lalrengpuia, MFA
K. Lalenghluna, MFA