Tunkar tawpah Tour de Hmuifang

Mizoram Cycling Association (MiCA) leh Tourism Department ṭangkawpin an buatsaih, thirsakawr intlansiaka inelna Tour de Hmuifang vawi 2-na chu November 18-19, 2022 hian tlan a ni leh dawn.

Nikum October 2 khan Tour de Hmuifang hmasa ber chu tlan a ni a, category I (kum 35 hnuai lam) a pakhatna chu Sihfa tlangval niin darkar hnih leh minute 14-ah a thleng. Hemi ṭum hian Zero Point, Mualpui aṭangin an tlan ṭan a, category II (kum 35 chunglam) ah Mission Veng tlangval Lallawmsanga chu pakhatna niin darkar hnih leh minute 25-ah a tlan thleng.

Tun ṭum inelna erawh kalphung tih danglam hret a ni a, ni hnih awh a nih dawn ni khatnaah hian R. Dengṭhuama Hall, Mualpui aṭangin Hmuifang panin an tlan ang a, Robert Romawia Royte, Sports Minister leh Tourism changtu ni bawk chuan cyclist te a vai liam ang. Ni hnihnaah Thenzawl Golf Course atangin Hmuifang panin an tlan leh ang.

Kumin Tour de Hmuifang hi International Tourism Mart (ITM) nena intawngin, Adventure sports hi tourism industry atan a pawimawhzia tarlanna hmanrua atan hman nghal tur a ni.