Eden Hazard a inringtawk

Belgium captain Eden Hazard chuan an ram ring ngam lotute chu thil tih hmanga hmuh tir an tum thu a sawi a, an ram bakah amah chu World Cup khel tura an inpeih thu a sawi bawk.

Chelsea forward hlui Hazard hian a vawi thum nan World Cup a khel dawn. Real Madrid coach Carlo Ancelotti hnuaiah khelhna a chang phak lo a, match a khelh tam loh avangin tun hma lam a phak loh mai ringtu an tam.

Kum 31 mi Hazard chuan, "Euro 2020 kan khelh dawn pawh khan ka chungchang hi min zawt tawh, club tana match khel tam tawk lo chungin ram tan ka feh chhuak. Tournament-ah khan buaina ka nei hran lo, ka khelh dan pangngaiin ka khel thei chuan ka hria.

"Ka taksa a hrisel ṭha a, tun hma lama ka khelh anga khel tur chuan World Cup hmaa match khelh ngei chu ka mamawh, chuvangin Egypt nen friendly match kan khelh tur hi ka ngai pawimawh hle," a ti.

Belgium hian Zirtawpniah Egypt nen friendly match an khel dawn. South African ram hi World Cup khel tura tling zo lo ram an ni a, chutih rualin player ṭha an neih tho avangin inbuatsaihna ṭha tak an nei thei tura ngaih a ni.

Golden Generation chungchang zawhna chhangin Hazard chuan, "A pawimawh ber chu Qatar World Cup kan khelh tur hi a ni, ṭhenkhat chuan keimah mai bakah midang kum an chhut a, kan tana hun ṭha hnuhnung niah an ngai hlawm.

"Kum leh hma hun buaipui hun a ni rih lo, tunah chuan World Cup atan chauh rilru kan pe. An champion leh chuang lo ang, tia min ring ngam lotute lakah hian rin tlak kan nih zia a taka lantir kan tum ang," tiin a sawi.

Belgium hi Group F-ah Canada, Morocco leh Croatia te nen an awmkhawm. An match hmasa ber atan Canada nen November 23, Nilainiah Canada nen an inkhel ang.