Portugal-ah Ronaldo a hlim - Joao Mario

Manchester United nen buaina nei mah se, tun dinhmunah Cristiano Ronaldo chu an ram Portugal team lamah a hlim hle niin a teammate Joao Mario chuan a sawi chhuak.

Tun hnai khan Ronaldo chuan an club khelhna Man United-in an phatsan niin a sawi, a thusawi hian medai a luahkhat. World Cup khelh tura an inbuatsaih lai pawhin a thu sawi hian ngaihven a hlawh chhunzawm reng.

Kum 29 mi Mario chuan, "Mi hrang hrangin Cristiano chungchang an sawi, kan tan buaina tur erawh a awm lo. Ram tana a feh chhuah chuan engtik lai pawhin a hlim, training kan neihna hmunah pawh a hmelah a hlim tih a lang," tiin a sawi.

Thawhṭanni khan Ronaldo leh Bruno Fernandes nen inchibai lai video a darh leh a, hei hian titi leh rinthu a ti tam. Mario chuan video tawite darh chu pawn lama an ngaih ang a nih loh thu a sawi tel bawk.