I League-ah Rajasthan an chak

Thawhlehni zan khan I League-ah Churchill Brothers-in Rajasthan FC an mikhual a, coach Pushpender Kundu kaihruai Rajasthan-in 2-1 in hnehna an chang.

GMC Stadium-ah Goan club tan Lalawmpuia Sailo-in bul a ṭan a, second half-ah Kelkang tlangval Lalkhawpuimawia a inlan bawk. Amaherawhchu Mizo telna aiin Mizo awm lohna Rajasthan an che ṭha zawk.

Rajasthan tan Melrowy Assisi-a'n minute 29-naah goal hmahruai a khung a, Churchill-in Adoulaye Sane hmangin half time hma hretin sut mah se Britto PM-a'n minute 75-naah Rajasthan chakna goal a khung.

I League-ah hian Mizo club Aizawl FC-in an match hmasa berah Trau nen an inhnehtawk a, table chunglama awm turin chak an mamawh. Standly Rosario hote hian November 18, Zirtawpni chawhnuah Gokulam Kerala an mikhual ang.