January-ah Barca bazar dawn lo

Barcelona president Joan Laporta chuan January thlaah player thar an lei theih a rin loh thu a sawi, player an lei theih loh a rin chhan hi La Liga lamin sum leh pai chungchanga inkaihhruaina an siam chu an bawhchhiat theih loh vang a ni.

Laporta chuan, "Kan club sum dinhmun a ṭha leh tawh, harsatna nasat tak kan tawh chu siamṭhat a ni a, hun harsa leh hrehawm tak kan tawhna chu kan siamṭha zel a ni, tunah chuan kan sum dinhmun pawh a ṭha leh tawh.

"Sum nei mah ila player thar lak erawh a remchang dawn lo, a chhan chu Spanish league-in a financial fairplay a siam kan bawhchhe thei lo," tiin dan leh hrai awmsa an zawm a ngaih thu a sawi.

September thla khan Barcelona chuan, season kal laia an hlep chu euro maktaduai 98 a tling tih an lo sawi tawh a ni.