State pariat zingah Mizoram PARUKNA
North East Olympic Games, Shillong-a neih chu nizan khan a ṭiak ta a, hmarchhak state pariatte infiamna kutpuiah hian Mizoram chu parukna kan ni - kan hnuaiah state pahnih chiah an awm!
November 10 aṭanga neih ṭan inelnaah hian Mizoram hian a vaiin medal 106 zet a la a, mahse, heng zingah hian gold medal 16 chiah Mizoramin a la thei - silver 30 lain, bronze 60 an la bawk.
Mizoram assistant chef de mission Malsawma Khiangte chuan, "Kan beisei kan phak lo a, hei aia ṭha zawka inelna khar thei tur kan ni. A bik takin contact sport-ah ṭan lak a ngai a, medal lak tam theihna a nih avangin sorkar pawhin heti lamah hian hma min laksak se ka duh hle," tiin Vanglaini a hrilh a, Mizoram tan hmasawn tura hmun hma ṭha zawk a ngaih thu a sawi.
Mizoram Olympic Association secretary general V. Lalzawmliana chuan, "Pathumna tal kan beisei a, parukna hi chu a ṭha tawk lo. A lehpek atan tuna inbuatsaih lehnghal a ṭul a, tih tak tak a ngai," tiin Vanglaini a hrilh a, Mizoram thlen chinah a lawm tawk lo.
Mazawma chuan, "A zahthlak zawnga ngaihtuah phei chuan, inelna hmachhawn pariat zinga parukna nih chu thil zahthlak a ni a, siamrem ngai lai kan siamrem a ṭul," a ti.
2nd North East Olympic Games 2022 hi November 10, Ningani zan khan Meghalaya chief minister Conrad K. Sangma chuan a hawnna a nei a, North East state pariat, Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura aṭanga infiammi kalkhawm mi 3,000 chuangin inelna an hmachhawn.
Mizoram aṭangin infiammi 262 zetin inelna hi an hmachhawn a, coaching staff leh official 73-in an ho bawk - Archery, Athletics, Badminton, Basketball, Boxing, Football, Judo, Karate, Shooting, Swimming, Table Tennis, Taekwondo, Tennis, Wushu, Cycling, Golf, Weightlifting leh Wrestling-ah te inelna neih niin, Mizoram hi inelna zawng zawngah an tel vek a, Archery, Swimming leh Golf chu Mizoramin medal a lak miah lohnate an ni.
Shillong khawpuia Mizo infiammi feh chhuak zingah boxing chu Mizoram tan an thawhhlawk ber a, gold medal panga an la - boxing dawtah table tennis an awm a, anni hian Mizoram tan gold medal pali an hlawh thung.
North East Olympic Games vawi khatna chu kum 2018 khan Imphal, Manipur-ah neih a lo ni tawh a, hemi ṭum hian inelna hrang hrang 18-ah intihsiakna neih niin, a thlengtu Manipur chuan medal 159 (80 gold, 48 silver leh 31 bronze) lain pakhatna an ni a, Mizoram chuan medal 52 ( 8 gold, 15 silver leh 29 bronze) lain palina an ni.
Mizoram hian tun kumah medal la hnem zawk mah se parukna ni chungin inelna an khar a, Mizoram tan hmasawnna tur a la tam tih a lang - Vanglainiin NE Olympic-a Mizo infiammi leh hruaitu tam zawk a biakte chuan, infiamna hmunhma leh bungrua neih ṭhat tawk loh chu Mizoram hmasawn loh chhana an ngaih thu an sawi a, ṭhenawm state tam zawkten hma lam an pan laiin Mizoram erawh kan hnungtawlh.
NE Olympic Games, 2022-ah hian Manipur chuan gold medal 88 lain, silver medal 75 an la a, bronze medal 77 an la bawk - pakhatna an ni a, an medal lak zawng zawng zat chu 240 a ni a, NE Olympic-ah a zawnin an champion tihna a ni!
Pahnihna Assam chuan medal 79 lain, silver 61 leh bronze 63 an la a, an medal lak zawng zawng belhkhawm zat chu 203 a ni - Mizoramin ṭhenawm state-te kan la phak lo vet vet hle. Arunachal Pradesh chu pathumna an ni a, gold 39 an la thei a, an medal lak zawng zawng chu 112 a ni.
Inelna thlengtu Meghalaya-in medal 149 la mah se, gold 36 an lak avangin Arunachal hnuaiah an awm a, palina an ni. NE Olympic Games hi kum 2024-ah neih ṭan leh tur a ni a, Nagaland-in an thleng dawn - khawpui pathum Dimapur, Kohima leh Mokokchung-ah te inelna thleng turin ruahmanna kalpui a ni tawh.
Tun ṭum NE Olympic Games hi Shillong khawpuiah vek neih niin, hmun hrang hrangah inelna hi neih a ni a, Shillong Club, MFA Turf - Polo Ground, NEIGRIHMS Basketball Court, JN Sports Complex - Indoor Hall, SAI Centre - NEHU Campus, Crinoline Swimming Pool Complex, Indoor Hall - NEHU, Malki Forest, Shillong Golf Club, Laban Indoor Hall, Basketball Court - NEHU Campus leh Assam Rifle Indoor Hall-ah te inelna hi neih a ni.