Venghnuai 1-1 Electric Veng: MPL semifinal inchuh boruak a ‘HOT’

Honda MPL9-ah nimin khan FC Venghnuai leh Electric Veng FC te 1-1 in an inhnehtawk. Venghnuai bakah hian semifinal luh beisei dang Chhinga Veng an chak zawh loh bakah Mizoram Police an chak loh avangin round 14 inkhel boruak a sang dawn hle.

Nizan khan Chawnpui FC leh Chanmari FC an inkhel a, result kan hre hman lo. Eng result pawh awm se round tawp ber inkhel brouak a 'hot' tawh tho tho. Venghnuai, Chhingcows, Police leh Chawnpui ten hmunruak pakhat an inchuh ang.

An inhnehtawk
RG Stadium-a inkhelah Venghnuaiin bul an ṭan ṭha zawk a, goal pawh an khung hmasa. Minute 24-naah Venghnuai tan Peter Lalrinhlua'n ṭha takin a pet goal a, Rindika hote inkhel an thunun zawk avangin chakna goal ni thei tura ngaih a ni.

Venghnuai keeper Joel Lalramchhana'n hna a nei meuh lo a, amaherawhchu hun tawp hma hretin Electric Veng an vannei. Lalruatfela (RF-a) lakah Electric Veng substitute K. Lalchhuansanga lakah penalty a chawi a, Jonathan Lalrawngbawla rawn pen chhuakin minute 88-naah siphurh sutna goal a khung.

Jonathan hian tun season-ah goal nga a khung tawh a, match hnuhnung paliah goal a khung vek. Venghnuaiin hun tawp lamah goal khung tumin theihtawp chhuah leh mah se hun a tlem mah mah. Hun tawp hma hretin Electric Veng player Amos Lalnienga chu hnawhchhuah a ni a, Venghnuai tan an tamna hman ṭangkaina hun a awm tawh lo.

A nghawng a lian
FC Venghnuai kha goal khatin chak se chuan an elpui zinga mi Mizoram Police leh Chawnpui te an la inkhelh dawn avangin semifinal an lut dawn. An chak tak si loh avangin semifinal an la chiang lo a, nizan inkhelah Chanmariin Chawnpui lakah point an hmuh chuan an tling tho dawn.

Chutihrualin Chawnpui hi an chak a nih thung chuan Lalrindika Hmar hote hian semifinal an la lut dawn lo. Venghnuai hian head to head-ah Chawnpui an tluk lo a, hei hian nghawng lian tak a la nei thei a ni.

Boruak a hot
Round tawp berah Chhinga Veng leh Venghnuai an inkhel dawn a, Chhingcows hian point 19 hmuin Venghnuai hi point khat chauhin an hmu tam. Chawnpui leh Mizoram Police (19 pts) an inkhel dawn a, Lalsangzuala Hmar hote hi nizan inkhela an chak a nih chuan semifinal lut turin draw a tawk ang.

Chutihrualin nizan lamah eng result pawh thleng se semifinal boruak a hot dawn. Club pali Venghnuai, Police, Chhinga Veng leh Chawnpui FC zinga pakhat an vanduai dawn.