Chhingcows leh Aizawl inhnehtawk

Nimin khan Honda MPL9-ah Aizawl FC leh Chhinga Veng FC te an inkhel a, goal awm loin an inhnehtawk. I League club defender Lalmuanawma (Munez) chu man of the match-ah thlan a ni.

Standly Rosario-a'n I League-a a chhawr player-te a hahdamtir a, player ṭha dang zawng an inlan. Aizawl FC hi an ṭhat ber danin inrem lo mah se team ṭha tak an la ni. An khingpui Chhinga Veng erawhin semifinal khel turin chak an mamawh a, an ṭhat dan berin an lut.

First half-ah Chhinga Veng an che ṭha zawk a, second half-ah Aizawl FC an chungnung thung. Goal chance hmuh tur a tam loh avangin inkhel hmuhnawm tak tih tur erawh a ni lo.

I League club tan Jeremy Laldinpuia goal khung tur chu Chhinga Veng keeper RS Lallawmzuala'n ṭha takin a dang a, man of the match-a thlan Munez-a pawhin first half leh second half-ah a khung teuh viau bawk.

Chhinga Veng pawhin Lalchhanchhuaha (Jerry), Lallawmtluanga leh Lalengzama te hmangin chance an nei a, an khung thei bik lo. Darlung tlangval Lalrohlua ball pet pawh Aizawl keeper Hruaia'n a dang ṭha viau bawk.

Chhingcows-in point thum an hlawhchhuah theih loh avangin point 19 an hmu a, Mizoram Police nen an point hmuh zat a inang chiah. Team pahnih hi an point hmuh zat a inang chiah a, MPL dan thlir chuan 'away goal rule' a awm - an pahnih bikah chuan Chhingcows dinhmun a ṭha ta zawk.