Bethlehem-in Police ‘kim’ an hneh

Mizoram Police coach Lalbiaksanga Colney-in nimin zingkarah Sikkim an chhuahsan tur thu Vanglaini hrilh mah se FC Bethlehem an hmachhawn ṭumin an kim ṭhap. Police-in Mizoram chhuahsan hma ngeia Honda MPL9 semifinal inpettlin an tum a, amaherawhchu table hnuai lama awm FC Bethlehem an hneh loh avangin semifinal khel lo thei dinhmunah an ding.

Coach Victor Lalbiakmawia kaihhruai MPL kai thar Bethlehemin chak an phu a, Moses Lalrinzuala goal khung a ropui. Nizan khan Chanmari FC-in Chawnpui FC an hmachhawn a, K. Malsawmkima hoten point an hlawh chhuak lo a nih chuan Chanmarians an relegate ang a, Bethlehem an him ang.

RG Stadium-ah Police leh Bethlehem te chhun pachangah inkhel mah se team pahnih point mamawhna a san em avangin inkhel a nung hle. Team pahnih goal chance an inneih chhawk a, goal sarih khungtu Malsawmfela leh goal li khungtu Lalnunsanga (Tatea) ten Bethlehem tlarhnung an su tlang thei lo.

Bethlehem pawhin goal li khung tawh Lalbiakdika (BD-a) an nei a, Champhai Zotlang tlangval hian goal ban a pet per. Khawbung tlangval F. Lallawmkima pawhin a u Police keeper F. Lalmuanawma venah a pet goal thei lo.

Hun tawp hma hretin Germany thlenga football zir tawh Moses-a a rawn inlar a, hun pek belh minute linaah Khatla South tlangval hian box pawn aṭangin kawh zetin goal kilah tak a pet lut - goalkeeper ṭha Muanawma tan pawh dan ngaihna a awm lo. Police tan siphurh sutna hun a awm tawh lo a, Bethlehemin point thum hlu bik an hlawh chhuak.