MPL6 semifinal kan nghak chhuak ta Aizawl FC vs Mizoram Police
Mizoram Police-in Mizoram Premier League history-a a vawi khat nan semifinal an lut a, I League champion Aizawl FC-in a lungthu kim nan MPL nomawi chawi an tum thung.
Zanin dar 7:30 hian Lammualah Aizawl FC leh Police ten semifinal first leg an khel dawn. Final lut tur zawnna hi minute 180 chhung neih tur a ni a, minute 90 dang hi November 30, Ningani zanah neih a ni ang.
En man leh mipui
MPL semifinal inkhel en man hi Rs 50 a ni a, naupang kum 14 hnuai lam tan en man a ngai lo. Final luh inchuhna a nih avangin inkhel a hmuhnawm dawn tih a chiang.
I League a hnaih tawh avangin Aizawl FC-in khelmual chhung leh pawnah ṭan an la chho a, Red Army-in RG Stadium-a an zia an chhuah hmain Lammualah thawm an nei ring hmasa ang. AFC nena sawi zawm theih nghal chu rawng sen a ni a, I League club ṭantuten kawr sen an ha ang a, K. Kawla Standaṭangin khuang nen awmze neiin thawm an nei ang.
Mizoram Police ṭantute an mumal ang em tih hi zawhna a awm ang a; amaherawhchu Aizawl FC ṭantute aia thawm an neih rin erawh a rinawm zawk. Police ṭantuten Zomuanthanga Stand-ah awm hmun an khuar thung dawn a ni.
AFC leh Police hi tun hma aṭanga tualchhung football tinungtu an ni a, hei vang hian kum upa lam pawhin tun hma ngaiin Lammual an pan ang a, inkhel enna hmun nuam lai bera an sawi ṭhin tlang lamah hman leh tun an khaikhin dawn.
Ṭha tura duan AFC
Aizawl FC hi Mizo club ṭha tak an ni satliah lo a, India ram champion lai an ni.
Portuguese coach Paulo Meneses hnuaiah AFC-in MPL leh I League chawi kawp an tum a, MPL club hian season dang zawng aiin sum pawh an seng nasa. Mawlmang taka thlir pawhin Meneses leh a assistant Spanish coach Izan Martin Andres-te chhawr thei club hi team chhia an ni thei lo.
AFC hian I League atan foreigner paruk an la lut a, MPL-ah erawh pahnih chauh an chhawr thei thung.
I League best midfielder ni lai Alfred Kemah Jaryan leh Nigerian defender Kareem Omolaja te nen bul an ṭan a. Tunah chuan Romanian midfielder Andrei Ionescu leh Afghan defender Masih Saighani ten an thlak.
Mizo player-ah pawh nomawi chawi thei bik William Lalnunfela, winger ṭha H. Lalmuankima, midfielder theihna nei sang David Lalrinmuana te bakah rawlthar duhawm Jonathan Lalrawngbawla leh Rochharzela te an kawl a, bench-ah pawh player langsar la ṭhuttir thei an ni.
Tawnhriat ngah Police
Mizoram Police-in season bul an ṭan fuh loh avangin relegate tura ngaih an ni hman a; amaherawhchu Police team hi kan belchiang a nih chuan Mizoram aiawh pawha rinrawl ber an la ni.
Police captain V. Lalṭanpuia bakah F. Lalrinpuia, Lalfakzuala, Lalbiakhlua, Lalsangbera leh Lalhmunmawia te hi player naran chunglam vek an ni a, Mizoram tihmingṭha tawhtute an ni.
Rawlthar midfielder duhawm Zosangliana an neih belh bawk a, coach Lalbiaksanga Colney-in Police a enkawl hnua a lakluh defender Zomuanpuia leh midfielder Lalbiakhlua (Hlutea) ten team an tichak sawt bawk.
Intum tawk tur
Aizawl FC hian Portuguese coach Meneses hnuaiah Mizoram Police hi 6-1 in an sawp tawh a, amaherawhchu Police hi coach BS-a Colney-in a ho hnuah 2-2 in an inhnehtawk.
I League club-in an match hnuhnung berah Ramhlun North an hneh lo a, hemi ṭum hian Romanian midfielder Andrei a inhliam. Police an hmachhawn hunah hian Romanian midfielder hi a dam hman lo a nih chuan Aizawl FC tlarhma a nem sawt dawn tihna a ni.
Police in an match hnuhnung berah Chhinga Veng an hneh bik lo a, amaherawhchu he mi ṭum hian goal riat khung tawh Valpuia chu bench-ah dah a ni a, captain Ṭ-a chu hrem vangin a inlan lo bawk. Zaninah erawh Police hi an kim dawn a, Aizawl FC hmachhawn turin an inpeih tawh.
SEMIFINAL - Minute 180!
7:30 PM Aizawl FC vs Mizoram Police
1st Leg : Zanin - November 23, Ningani
2nd Leg : November 30, Ningani
7:30 PM Chhinga Veng FC vs Chanmari FC
1st Leg : November 24, Zirtawpni
2nd Leg : December 4, Thawhṭanni