City-in hma an hruai chiang
Manchester City chuan an mikhual Feyenoord 1-0 in an hneh a, match khat khelh tur la awm mah se Champions League Group F-ah hmahruaitu an ni chiang tawh - Etihad Stadium-a inkhelah hian City hian goal khung turin minute 88 an nghah thlen a ngai a, Raheem Sterling chuan he inkhela goal awmchhun chu a khung.
Group F inkhel dangah Napoli chuan last 16 luh an beiseina chhi nung turin Shakhtar Donetsk chu 3-0 in an sawp bawk a, Lorenzo Insigne, Piotr Zielinski leh Dries Mertens ten goal khat
ṭheuh an khung - Serie A hmahruaitu Napoli hian last 16 lut tur chuan an match hnuhnung berah Feyenoord an hneh a ṭul ang a, City-in Shakhtar an hneh a ngai bawk ang.
Inkhel hautak
Rotterdam-a City leh Feyenoord intawn hmasakin Pep Guardiola nauten 4-0 ngawtin hnehna an chang a, Etihad Stadium-ah buaina an nei lo tura ngaih a ni. Mahse, beisei angin City an khel lo a, Sergio Aguero-a'n chance ṭha vawi tam a hlah bakah Yaya Toure chuan freekick aṭangin uiawm takin a hlah bawk.
Mahse, minute 88-naah Pep-a hnuaia harhtharna chang mek Sterling chuan Dutch club tlarhnung paltlangin goal a khung a, tun season-a inelna hrang hranga a goal 11-na chiah a ni! City-in hnehna an chang a, Champions League match nga an khelhah an la tlawm lo - inelna hrang hrangah match 19 a zawnin an chakna a ni ta bawk a, Guardiola-a'n City-a enkawl hnua match 75-a vawi 50 hnehna a channa chiah a ni bawk.
Hmabak hautak
City-in hmahruaitu nichungin last 16 an lut dawn chiang a, hmahruaitu nih hi knockout round-a team ṭha pumpelhna nia ngaih ṭhin ni mah se tun ṭumah erawh a ni dawn lo - City hi champion lai Real Madrid, season hmasa finalist Juventus leh German champion Bayern Munich hmachhawn thei dinhmunah an ding mek!
Pep Guardiola erawh a lungphang lo. Spanish manager chuan, "Match tinah hnehna chan tumin kan khel a, hnehna chan zel hi kan duh chu a ni mai. Last 16-a kan tum turah ka buai lo a, knockout round chin chu engtiklai pawhin a harsa ṭhin a ni," a ti a, second half-a a luhtir FIFA World Cup U17 India-a rawn khel Phil Foden leh Spanish midfielder kum 18 mi Brahim Diaz chu, "Hma an sawn zel ka beisei," tiin an chungchang a sawi bawk.