Zotlang Rockets-in final inkap thleng
3rd Hrangbana Memorial Mizoram Badminton League-ah team thar Zotlang Rockets chuan Thawhleh zan khan nikum finalist Mission Veng 3-0 hnehin final an lut.
Mizoram chhunga badminton inelna sang ber final hi November 24, Zirtawp zan hian Electric Veng YMA Hall-ah khelh a ni dawn. Zotlang hian nizan lama inkhel Tuikual Shuttlers leh Southern Acers Siaha chak zawk an hmachhawn ang.
Sequence fuh
Zotlang ṭhatna chu an state pawn player Kiran B a ni a, hei vang hian Under 19 leh Men's Singles 2-ah an ṭha a, mixed doubles-a number 1 F. Vanlalhriatpuii an kawl avangin XD-ah hian an ṭha bawk.
Semifinal khelh dan pawh a ni a, khelh dan indawh chu XD, MS-2, U19 BS, MD leh MS-1 a ni a, a hmasa pathum hi Zotlang ṭhatna a ni.
A hmuhnawm nghal
Zotlang tan R. Lalbiaksanga leh Hriati te inkawpin Mission Veng tana Lalduhawma (Lalmama) leh Lalrinhluii te inkawp an hmachhawn a, inkhel inhnehtawk leh hmuhnawm thlir tur a awm.
Lalmama thla zar hnuaiah Hlutei a khel ṭha a, amaherawhchu 14-14 a nih laiin Hlutei tawnhriat neih tlem a lang a, game lakna turah net a bel. Second game-ah pawh Mission Veng an khel ṭha a, tawnhriat nei ṭha Zotlang lam an talbuai duh lo. Game hnihna pawh 14-14 a ni hman a, Lalmama'n rang takin BS-a smash la hman mah se hun pawimawh a tisual - tawnhriat ngah zawk Zotlang an chak.
Kiran-a show
Group stage-a khingpui zawng zawng hnehtu Kiran B-a'n Men's Singles 2-ah Zarzokima chu 15-9, 15-10 in a hneh a, Mizoram number 4 Zarkima tan chetna hun a siam lo.
Under 19 boys khelh chhunzawm a ni a, Hlimen rawlthar K. Lalmalsawma tan vengah pawh a u en Zarkima hnehtu Kiran cho rual a ni lo. Zotlang player Kiran hian 15-4, 15-7 hnehna a chang a, player of the tie-ah thlan a ni.
Mipuiin an chan
Mission Vengin sum tam tak sengin India number 3 Pratul Joshi an chahlut a, amaherawhchu Pratul inlanna tur men's singles leh men's doubles an khelh hmain result a chiang hman. Nikum finalist Mission Veng hian mixed doubles la se result a dang thei tih a ni.
Pratul Joshi-a inkhel en châkin badminton ngainatute an pungkhawm a, semifinal-ah India number 3 inkhel lai hmuh tur a awm lo. Mission Veng sum sen a thamral a, MBA-in inelna kalphung an ennawn a ṭul niin a lang bawk.