Germany lamah Arsenal inlan dawn

Arsene Wenger-a nauten Europa League knockout round an lut chiang tawh a, group hmahruaitu an nihna erawh a la chiang bik lo. Zanin dar 11:30 hian Arsenal chuan Bundesliga club Cologne an lenchilh dawn a, point khat an hmuh belh a nih chuan midang tan lehpelh theih an ni tawh lo ang.

Phur vanglai

Arsenal hian North London derby-ah Tottenhman an hneh hlim a ni a, an hmelma leh elpui laka chak zo hlim hi an boruak ṭhat vanglai tak a ni. Premier League ngaipawimawhtu Wenger-a'n league lama a chhawr ṭhin player te tan hahchawlhna hun a siamsak leh ngei tura ngaih a ni.

Hliam vanga kartawp match khel lo Olivier Giroud chu inkhel turin a inpeih tawh a, dam lohna vanga Spurs hmachhawn lotu Theo Walcott pawh a dam tawh. Goal keeper Petr Cech aiah Colombia international David Ospina-a'n si ban a nghak leh zawkin a

rinawm bawk.

Group match hmasa lama chhawr rim Calum Chambers, Mathieu Debuchy leh Ainsley Maitland-Niles ten hmun an chang leh ang a, rawlthar rual Eddie Nketiah, Reiss Nelson, Matt Macey, Chuba Akpom, Jordi Osei-Tutu, Joe Willock, Marcus McGuane, Ben Sheaf leh Josh Dasilva te tan tawnhriat neih theihna hun a ni bawk ang.

Cologne beiseina

Arsenal leh Cologne te hi an group match hmasa berah an intawng a, Gunners hian 3-1 in hnehna an chang. Emirates Stadium-a an inkhelh ṭum hian Alexis Sanchez, Sead Kolasinac leh Hector Bellerin te an inlan, Wenger-a'n a player pawimawh pathum hi a chhawr nawn a rinawm tawh loh.

Bundesliga club hian match li khelh-ah point thum chiah an la hmu a, an chungah hian Crvena Zvezda (5pts) leh BATE (4pts) te an awm. Zanin hian Crvena Zvezda leh BATE te an inhmachhawn ve thung dawn a, an inhnehtawk a nih a; Cologne hian Arsenal an hneh thei a nih chuan round of 32 luh theihna kawng a la awm a ni.

Milan fiahna

Serie A mai ni lo Europe thlenga club lian leh sulhnu nei ṭha AC Milan-in an ropuina neih let an tum a, Chinese sumdawng hausa kut an luh hnuah player thar lakluh nan sum an hmang hnem hle. Vincenzo Montella naute hian league lamah beisei an phak lo a, an match hnuhnung berah hmahruaitu Napoli chu 2-1 in an ngam lo - zanin hian Europa League khel turin AEK Athens an mikhual ang.

Milan hian point riat hmu tawhin Group D hmahruaitu an ni mek a, zanina an mikhual tur Greek club hian point ruk hmuin pahnihna an ni thung; club pahnihte an intawn hmasakin goal awm loin an inhnehtawk a, zanina chak zawk tan group hmahruaitu ni chunga knock out round lut turin dinhmun a ṭha dawn.