Chennaiyin-in Highlanders mikhual dawn

Zanin dar 8:00-ah Indian Super League match khat a awm dawn a, match hmasa bera hnehna chang zo lo pahnih inhmachhawn turah Chennaiyin FC chuan NorthEast United an mikhual dawn.

Mizo tlangval Jeje Lalpekhlua leh Jerry Lalrinzuala te khelhna Chennaiyin FC hian an match hmasa berah FC Goa mikhualin rin loh takin 3-2 in an tlawm a, zaninah an mualah tlawm nawn an duh dawn lo.

Chennai club tan hian The Mizo Sniper tia hminglem an pek Jeje-a'n a hminglem an phuah chhan ang ngeia goal a khung an beisei ang a, Goa laka Emerging Player of the Match dinhmun luah thei Jerry-a lakah beiseina a sang dawn bawk.

NorthEast United-in an match hmasa berah hnehna an chang zo bik lo a, ISL club thar Jamshedpur FC chu goal khung loin an inhnehtawkpui - khualmual an lenchhuah hmasak berah tlawm an tum lo ang.

Highlanders tan hian match hmasa berah Robert Lalthlamuana chuan captain armband a hreng a, Lalrindika Ralte chuan inkhel bul a ṭan bawk - Mizo player tawnhriat ngah pahnih hian inkhel bul an ṭan leh ngei a rinawm a, rawlthar Lalrempuia Fanai a la awm bawk.