Mahuma Memorial I Div Chhinga Veng an chak

Mahuma Memorial Cricket Tournament inkhelah nimin khan Chhinga Vengin hnehna an chang a, an hmaa ding Ramhlun Venglai chu wicket liin an hneh.

Suaka Cricket Ground, Sihhmuia inkhelah Ramhlun Venglaiin vuak hmasak an thlang a, bul an ṭan fimkhur hle.

RVL tan opener Lalhruaitluanga (35), Joseph Lalthankhuma (26) leh Lalchhuanliana (46) te che ṭha mah se Chhinga Veng bowler Lalhruaimawia Ralte chuan over riat a vawmah run 18 lek pea wicket thum a lak avangin RVL hian over 37.3-ah wicket an hloh vek a, run 145 an tlin thei hram.

Chhinga Veng tan target sang tak a ni lo a, um a harsa lo - tawnhriat nei ṭha K. Vanlalruata'n run 69 zet rawn vaw chhuakin a team hlui lakah Chhinga Veng hnehna a chanpui - over 30.4-ah wicket ruk lek hlohin an target an umpha a ni.

Nimin Inkhel Result
Chhinga Veng CC: 147/6 (30.4) bt Ramhlun Venglai CC: 145/10 (37.3)
Chhinga Veng 4 wicket in an chak

Vawiin Inkhel Tur
09:30 AM Zarkawt Lords vs Kulikawn CC