Record Roreltu Ronaldo

Cristiano Ronaldo chuan Champions League mellung pawimawh a phun leh ta.

Real Madrid forward hian Apoel Nicosia lakah goal hnih khungin kum 2017 chhung he inelnaah hian goal 18 a khung tling tawh a - khum khat chhung (season khat ni lo) Champions League-a goal khung hnem thei ber a ni.

Thawhlehni zan GSP Sta­dium-a inkhelah Luka Modric chuan Apoel defender ball pet­chhuah fuh lo lo dawng fuhin an goal hmahruai a khung a, La Liga champion tan hian Ronaldo leh striker Karim Benzema ten goal hnih an khung belh bakah defender Nacho-a'n goal khat thawh vein 6-0 in hnehna an chang.

Kum 32 mi Ronaldo hian Champions League match a khelh hnuhnung 10-ah goal 18 a khung tawh a, Europe club te inelna sang berah hian goal khung hnem ber niin goal 113 a nei tawh, amah hnaih bertu Barcelona thiampuipa Lionel Messi aiin goal 16-in a khung hnem zawk mek.

A zawna Champions League nomawi chawi thei Zinedine Zidane-a naute hian point 10 hmuin last 16 an lut a, Real hian an group match hnuhnung berah Dortmund an mikhual ang; hnehna an chang a nih pawhin an group-ah pahnihna bak an ni thei tawh lo.

A chung berah Spurs

Group H inkhel dangah Tot­ten­ham chuan Borussia Dort­mund chu 2-1 in an va luhchhuah, Mauricio Pochettino naute hian match khat khelh hmabak nei chungin a chung berah an awm dawn tih a chiang tawh.

Bundesliga club Dortmund striker Pierre-Emerick Auba­meyang goal khung chu Premier League club hian Son Heung-min hmangin an sut a, striker Harry Kane-a'n chakna goal a khung bawk - Kane hian tun season Champions League-ah goal ruk a khung tling chiah.

England international Kane chuan, "Kan awmna group an hriat khan mi tam tak chuan last 16 kan luh an ring lo, keini lam chuan an ngaihdan a dik lo tih chu lantir kan tum ve thung, tunah chuan kan ṭhat tawk zia kan fiah a ni. Season hman chhoh turah ṭha taka kan khelh zel theih ka duhin ka beisei," tiin a sawi.

Spurs manager Mauricio Pochettino chuan, "Season hma­sa khan kan awmna group kan en a, Monaco, Leverkusen leh CSKA te an nih avangin kan tlang ngei dawn e tiin beiseina kan nei sang hle. Kuminah erawh group hautak bera ngaihah kan awm a, engmah kan sawi lawk tawh lo, a hautak dawn tih chu kan rilruah a chiang vek a ni," a ti.