Goal khung thiam + chhuah thiam = Liverpool

Liverpool-in awlsam taka Champions League last 16 luh theihna remchang nei mah se, an tlarhma hnathawh ṭhat chu an tlarhnung bawkin an tibuai - goal thum an thun hmasak hnuah Sevilla lakah goal thum bawk an chhuah.

Thawhlehni zan inkhelah Reds hian chawlhlawk hman a nih hmain 3-0 ngawtin hma an hruai a, mah se chawlhlawk hman a nih hnuah Roberto Firmino leh Sadio Mane-te goal chu thaiboin a awm. Team huaisen Sevilla-in tlarhnung pawp Reds lakah an si phurh an sut zo vek!

Liverpool-in knockout round lut tur chuan an match hnuhnung bera Spartak Moscow an mikhual hunah an tlawm a thiang lo ang - Russian club hian Group E inkhel dangah an mikhual Maribor chu 1-1 in an inhnehtawkpui.

Liverpool hmuhnawm

Sevilla-in an khelmual Sanchez Pizjuan an hmang thiam a, kum khat aia tam he khelmualah hian tlawm hmel an hmu tawh lo - mah se first half a tawp meuh chuan Sevilla hi an tlawm ngei dawn niin a lang tawh.

Philippe Coutinho-a'n Liverpool-in pound maktaduai 100 chuang pawha an hralh phal loh chhan a pholang a, Reds goal hmasa pahnih hi a corner pet

aṭanga lut ve ve a ni.

Minute hnihna lekah Fir­mino chuan Coutinho corner pet aṭanga Georginio Wijnaldum tauh pial chu goal-ah a chantir a, Champions League-a Liverpool-in goal rang pa­hnihna a ni.

Minute 22-naah Firmino-a'n Mane tan a siamsak ve thung a, minute 30-naah awl­sam takin an goal thumna a khung leh bawk - Li­verpool an chak chiangah ngaih a ni.

Mahse maw...

Liverpool-in tlarhma an neih ṭhat thu sawi a nih ruala sawi tel ngai nghal ṭhin chu an tlarhnung neih chhiat thu hi a ni.

Minute 51-naah ṭul lo takin Alberto Moreno-a'n freekick a chawi a, he freekick aṭanga ball kal hi Wissam Ben Yedder chuan goal-ah a chantir.

Minute kua a ral a, Moreno bawk a langsar - penalty a chawi. Yedder bawkin goal-ah a chantir a, hun pek belhah Guido Pizarro chuan an si phurh a sut zo bawk.

Reds manager Jurgen Klopp chuan, "Goal thum kan khung hnua kan sut zawh tir avang maiin ka naute rilru put hmang hi ka ringhlel chhin lo. Kan khelh danah lawm chi a ni lo tih chu ka pawm ngei a, mah se ka buai ta hluai anga sawi pawh a dik bik chuang lo. Kha aia ṭha zawka ti thei kan ni em, tih zawhna min pe a nih chuan, 100% in kan thei tiin ka chhang ang a, kan rilru puthmang vanga in puh dawn a nih erawh chuan 100% in a ni lo ka ti thung," tiin a naute a sawisel duh lo.