Australia coach a bang

Ange Postecoglou chuan World Cup-a Australia a hruai thlen aṭanga ni ruk hnuah a hna a bansan a, "He hna hahthlak tak hian min eiral a ni," tiin Socceroos (Australia sawina) enkawl hna a bansan chhan a sawi.

Kum 52 mi Greece-a piang Australian coach hian inter-continental playoff-ah Australia chu Honduras lakah 3-1 in hnehna a chanpui a, nak­kum Russia World Cup zawh thlenga an ram team enkawl tur hian inbiakna neihpui ni mah se ban a thlang ta zawk a ni.

Postecoglou chuan, "Ka tan chuan thutlukna harsa tak a ni. Mahse, professional leh a mimal tak pawhin he hna hian min nghawng nasa em em a, Australian football tan hun pawimawh tak a ni tih hriain ka theihna zawng zawng ka pe a, tunah erawh rilru hreh­awm tak chungin mangṭha ka tih a ṭul ta a ni"

"Mahni ram team ngei enkawl chu a hlimawm takzet a, chutihrualin beiseina pawh a sang hle. Tun hi mawhphurhna hautak em em ka neihte he hna hautak chelh thei tur midang kuta hlanchhawn hun a ni a, midang ṭha zawk tana kawng hawn hi Australian footballl association, player leh fan-te chunga ka bat a ni," a ti a, a hna a tlin tawh loh thu a sawi.

Postecoglou hian kum 2013 khan Holger Osieck thlakin Australia hi a enkawl ṭan a, kum hnih hnu lawkah Asian Cup nomawi chawpuiin match 49-a kaihhruaiah vawi 22 hnehna a chanpui thei.