Ronaldo thusawiin min ti buai lo - Portugal coach

Portugal coach Fernando Santos chuan, tun hnaia Cristiano Ronaldo-a'n a khelh mekna Manchester United nen an inkar a sawi chhuah chuan an ram team lamah nghawng a nei lem lo tih a sawi.

Ronaldo hian Man United bakah club neitu thlengin a duhkhawp lohna a sawi. Portugal lama a khelh pui Bruno Fernandes leh Diogo Dalot te tan thu hriat nuam a ni kher lo ang, hei vang hian media pawhin zawhna an nei nasa.

Santos chuan, "Cristiano Ronaldo chauh a ni lo, player dang tam tak pawhin interview an nei tawh ṭhin, mimal zalenna a nih avangin kan zahsak tur a ni. Portugal lamah nghawng a nei lo, tunah chuan Qatar World Cup khel turin kan inbuatsaih tawp mai a ni," a ti.

Ronaldo hian Nilaini khan team training a zawm thei lo, a training loh chhan hi a pum nawm loh vang nia sawi a ni a, nizana Nigeria nen friendly match an khelhah pawh a inlan ve lo ang.

Portugal hi World Cup Group H-ah Ghana, Uruguay leh South Korea te nen an inel dawn.