Pate champion thar Lalawmpuia

Mizo Inchai pate huangah B. Lalawmpuia chuan, champion lai Lalchhanhima hnehin champion kawnghren a hreng haw. Mizo inchai title fight bikah chuan Thenzawl tlangval Awptea hian title a lak hmasak ber a ni.

Nilaini zan khan Dawrpui Multipurpose Hall-ah title fight zan hnihna neih niin, inchai tir lam aṭangin Lalawmpuia a che fuh hmasa zawk. Tawnhriat nei ṭha Chhanhima lakah a inveng thei a, a chet ranna leh thahrui a neih a chhawr hle.

Inchai a rei tial tial a, kum naupang zawk Awptea a che fuh chhunzawm zel, round sarihnaah full point a hmu a, a hnu lam round pathum pawh la chhunzawm lehin a phu ang ngeiin Mizo inchai pate champion a ni.

Lalawmpuia chuan, "Hetiang dinhmun ka thleng ve mai hi a mak, min thlawptu mi tam tak an awm a, anni vanga tun hun thleng thei ka ni," a ti a, a khingpui Chhanhima chu hun rei tak inchai thunun thei a nih avangin zah a phu tih a sawi bawk.

Kum 2014 aṭanga pate champion ni tawh Lalchhanhima chuan inchai a chawlhsan thu a puang zui nghal. Saitual tlangval chuan, "Tun ṭum kan inchaiah chuan hnehna chan phu zawk a chak, ka lawmpui hle.

"Hun hei leh chen min hruaitu Pathian chungah ka lawm a, kan khua leh ka hnathawhna mai bakah hmun hrang hranga min ṭan tute chungah ka lawm, ka tan chuan wrestling zinkawng chu a zo ve ta," a ti.

Lalvenhimi a champion
Mizo Inchai huangah Lalvenhimi hming a mawi leh ta, hun rei tak chhung nulian champion pawh lo ni tawh hi tunah chuan nute champion a ni leh ta. Bethlehem Veng nula hian Lalnuntluangi hnehin champion kawnghreng a hlawh chhuak.

Champion tum pahnih an inchai tawk hle, tawnhriat nei ṭha Venhimi hi round nga an khelh zinga paliah a chungnung, a point sang zawk mah se an dinhmun a inthlau lo tawn, an in bawhbeh tawn ve ve theih avangin an inkhel tawk tih a chiang.

Tun hma deuhin Venhimi hian nulian title a lo kawl tawh. Mahse, Mizoram Wrestling Association in kalphung a thlak a, 65kg a buk zawh loh avangin a title kawl lai a hlan let a ngai a, nute huangah khelin a champion zui leh ta a ni.