Mizoram parukna - A hniam hret em?

North East Olympic Games, Shillong-a neih chu November 16, Nilaini zan khan a ṭiak ta a, hmarchhak state pariat zingah Mizoram chu paruknaah an awm. Hmarchhak state infiammite tana inkhawmpui lianah hian infiammi 3000 chuang an tel a, mimal anga hlawhtling awm bawk mah se Mizoram team anga dinhmun erawh chhuanpui tlak a ni lo.

Mizoram chungah Manipur leh Assam chuah ni loin Arunachal Pradesh, Meghalaya leh Nagaland te an awm a, infiamna lamah hmasawn a ṭul. NE Olympic-ah hian Archery, Athletics, Badminton, Basketball, Boxing, Football, Judo, Karate, Shooting, Swimming, Table Tennis, Taekwondo, Tennis, Wushu, Cycling, Golf, Weightlifting leh Wrestling-ah te inelna neih a ni a, Mizoram pawh inelna hrang hrangah tel kim vekin infiammi 262 zetin inelna hi an hmachhawn a ni.

Football leh Basketball
Khawvelin football inelna a ngaisang a, FIFA World Cup phei chu khawvela show ropui ti hiala sawi a ni ṭhin. Chutihrualin, NorthEast Olympic emaw National Games emaw thlir chuan football hian medal pahnih bak a keng tel lo a, kumin National Games-ah phei chuan medal beiseiawmna zawk mipa football-ah Mizoram an tel pha lo.

NorthEast Olympic-ah erawh Mizoramin football-ah theihna sang tak a neihzia a pholang a, Manipur bakah inelna thlengtu Meghalaya te hnehin mipa football-ah gold a la. Hmeichhe lamah Mizoramin bronze a la a, chanchin lawmawm tiha sawi theih a ni. Basketball pawhin football ang thoin 100% medal an la a, India hmarchhakah mipa team-in an chungnungzia an pholang.

Mahse, National Games thlir chuan football-ah medal beiseina a awm thei ang a, basketball-ah erawh medal beisei ngam chi a la ni lo. Mizoramin medal tam zawk lak a tum a nih chuan team inelna ni loin mimal inelna lam a thlir a ṭul niin a lang.

Combat Sport
Mizote ṭhatna ber tur nia lang ta chu combat sport hi a ni a, NE Olympic-ah hian combat sport-ah tun ai hian che ṭha ta ila, parukna ni loin pathumna hiala awm chhoh theihna tur a ni.

Mizoram Boxing Association (MIZBA)-in boxer 17 an tir a, medal 16 an la - result ṭha tiha sawi theih a ni. Mahse, olympic-ah chuan gold a pawimawh fal a, final-ah boxer pasarih ngawt an chak lo. Boxing-ah Mizoram an che ṭha lo ni loin tun aiin che ṭha se Mizoram hi panganaah an awm thei ang.

Combat sport dang Taekwondo, Judo, Karate, Wrestling leh Wushu-ah Mizoram an che ṭha lo a, heng infiamna pangaah hian infiammi 86 an kal chungin gold medal pathum chiah an la. NorthEast Olympic vawi thumna a awm leh hunah tun aiin Mizoram an che ṭha dawn a nih chuan heng infiammna panga enkawltu association te hi tun aiin an ṭan a ṭul ang. Chutiang bawkin sorkar pawhin a ngaihven a ṭul a ni.

Infiamna dang
Infiammi kal dan aṭanga teha Mizoram chet ṭhatna ber chu table tennis a ni thung. TT-ah infiammi pariat an kal a, medal 10 an la. Infiammi kal zat aia medal lak tam chhan hi team event a awm tel vang a ni. Mizoram Table Tennis Association (MTTA) an fakawm a, an hma thlir erawh National Games a nih a ngai ang.

Lawn Tennis-ah Mizoram aṭangin gold la thei an awm lo a, khawvel pum huapah pawh India an lang phak avangin National Games-a medal la tur chuan kawng a thui. India rama che ṭha tur chuan Mizoram Tennis Association (MTA) in kalphung thar an duan a ṭul ang.

Shooting hi Mizo thiam chi tak a nih theih dan a awm a, tun ṭumah pawh medal paruk an la. Mahse, shooting pawh hi khawvel huapa India lan phakna a ni a, National Games-a che ṭha tur chuan hmabak a la thui dawn.

Archery, Golf leh Swimming-ah erawh Mizoram a la hnufual tih a lang a, hmarchhakah pawh medal lak phak loh chuan wildcard a nih ngawt loh chuan National Games-a tel phak pawh a har ang. Chutihrualin archery erawh Mizo pa Lalremsanga hming ṭhat tawhna a ni a, hmarchhak inelnaa medal la awm lo hi chu hriatthiam a har a ni.

Mizoram chet ṭhat loh chhana mawhphurtu ber chu Mizoram sorkar a ni lo thei lo a, chutihrualin association hrang hrangin mawhphurhna sang tak an nei. Medal lak dan aṭangin association ti ṭha leh ṭha lo teh vek theih ni lo mahse association dinhmun erawh thui tak a lang.