MPL9 round tawp ber a hmuhnawm dawn ; Venghnuai leh Chhinga Vengin semifinal an lut
Zote Honda MPL9-ah Nilaini zan khan Chawnpui FC leh Chanmari FC te 1-1 in an inhnehtawk a, inkhel result hian nghawng lian tak a nei - semifinal khel turin FC Venghnuai leh Chhinga Veng FC te an tling.
Chawnpui FC-in point khat hlu tak an hlawhchhuah avangin semifinal khelh beiseina an nei chhunzawm a, match tawp bera Mizoram Police 'kim lo' an hneh chuan semifinal an khel dawn. Chanmari pawhin MPL khelh beiseina an nei chhunzawm a, FC Bethlehem an hneh chuan relegation playoff an khel thei ang.
Goal khat ve ve
Nilaini chhunah Khatla East tlangval Moses Lalrinzuala goal ropui hmangin FC Bethlehemin Mizoram Police an barakhaih a, MPL kaitharin Police 1-0 a an hneh avangin Chanmari FC tla thei dinhmunah an ding.
Zan inkhelah Chanmarians hian Chawnpui an hneh lo a nih chuan tla thei an ni a, hemi a nih avang hian inkhel pawhin ngaihven a hlawh. Lalsangzuala Hmar kaihhruai Chawnpui hian Khawzawlah Chanmari hi an hneh tawh a, RG Stadium-ah pawh bul an ṭan ṭha zawk.
Chawnpuiin minute sarihna lekah Laltlanzova hmangin hma an hruai a, Zozoa hi Inter Village 2022 top scorer ni mah se MPL9-ah erawh goal hnih a khungna chauh a ni.
Chanmari FC-in coach K. Malsawmkima kaihhruaina hnuaiah match nga ngawt an chak lo zawn tawh a, goal an chhuah hma bawk avangin an dinhmun a derthawng. Minute 61-naah Chawnpui defender Lalrinchhana Tochhawng tih ṭhat tawk loh vangin Malsawmzuala'n ball a chang a, Chanmari midfielder hian ball pek luh chu H. Lalmuankima'n ṭha zetin a pet goal. Bawngkawn forward MK-a'n MPL9-ah goal account a hawng ve chauh.
Chawnpui midfielder nung ṭha zet K. Lalhriatzuala chu man of the match-ah thlan a ni a, goal dang hmuh tur a awm lo. Team pahnih 1-1 in an inhnehtawk.
Point khat a tawk
Chanmari FC tan point khat leh point thum hmuh hi danglamna a awm lo a, MPL khel zel turin point hmuh hrima ngai. Coach Mala hoten point khat an hmuh avangin beiseina sang tak nei chungin MPL match hnuhnung ber an khel dawn.
Chanmari hian November 19, Inrinni zan dar 7:00-ah FC Bethlehem an hmachhawn dawn a, hnehna an chang a nih chuan MPL an khel zel ang. Chutihrualin point thum an hmu thei lo a nih chuan a vawi khat nan MPL aṭangin Chanmari FC an relegate ang.
MPL-a vawi hnih champion tawh Chanmari hian Electric Veng an umpha thei tawh lo a, hemi a nih avang hian chak pawh ni se relegation playoff an khel dawn. Relegation playoff-ah hian MPL pasarihna leh MPL qualifying-a pahnhna te an inkhel ṭhin a ni.
Venghnuai leh Chhinga Veng tlin dan
FC Venghnuai tlin dan:
FC Venghnuai hian an match hnuhnung berah Chhinga Veng FC an hmachhawn dawn a, an chak lo a nih chuan an chungah Aizawl FC bakah Chhingcows an awm. Inkhel dangah Mizoram Police leh Chawnpui FC te an inkhel dawn. Police an chak a nih chuan Venghnuai hnuaiah Chawnpui an awm ang a, Lalrindika Hmar hote hi palinaah an awm ang.
Police leh Chawnpui hi inhnehtawk ta se, Venghnuai hi Police aia head to head-a an ṭhat zawk avangin pathumnaah an awm ang. Police hi palinaah an awm ang a, Chawnpui panganaah an awm ang.
Chawnpui hian Police hneh thung se chuan Chawnpui hi pathumnaah an awm ang a, Police hi panganaa awmin semifinal an khel pha dawn lo.
Chhinga Veng tlin dan:
Chhinga Veng hian Venghnuai hneh loh thung se chuan Chhingcows hian point 19 an hmu dawn. Mizoram Police-in Chawnpui an hneh chuan Lalsangzuala Hmar hote panganaah an awm ang. Police leh Chawnpui an inhnehtawk a nih chuan Sanga hote leh Chhinga Vengin point 19 ve ve an hmuh dawn avangin head to head a ni dawn.
Round 5-ah Chhinga Veng FC-in Chawnpui FC 1-0 in an hneh a, fixtures-ah chuan Chhinga Veng 'home' a ni. Round 8-ah Chawnpuiin Chhinga Veng hi 2-1 in an hneh ve leh a, hei hi Chawnpui 'home' a ni thung. An inkhelh tawhna aggregate-ah 2-2 ni mah se MPL danah 'away goal rule' a awm avangin Chhingcows hi an vannei ta zawk.
Chawnpui hian Police hi lo hneh ta pawh ni se, Police leh Chhingcows ten point 19 ve ve an hmu. Round 1-ah goal awm loin an inhnehtawk a, Chhinga Veng home a ni. Round 11-ah 1-1 in an inhnehtawk leh a, Police home a ni thung. Away goal rule bawkin Chhinga Veng an vannei.
MPL9 Handbook-ah chuan, "Club zinga point inang hmu pahnih (2) an awm a nih chuan a sang zawk zawnna atan club pahnihte inkhel result ‘head to head’ en tur a ni. Heng club pahnihte hi an lainhnehtawk cheu a nih chuan ‘away goal rule’ hman tur a ni," tiin a inziak. MPL semifinal-ah away goal rule paih a ni tawh a ni a, home leh away in danglamna a neih loh avangin league round-a dan pawh hi season tharah chuan ennawn a ṭul dawn niin a lang.