Australian Open khel tur Djokovic a lawm

ATP Finals a khelh mek laiin Novak Djokovic tan thu lawmawm a lo thleng, season thara Grand Slam hmasa ber Australian Open a khel thei dawn. Australia pan tur in visa a dil chu pawmsak a ni.

Kum 35 mi Djokovic hian Australian Open nomawi vawi kua a chawi tawh a, ani aia champion hnem an awm lo. Season hmasa khan hripui leng chungchanga inkaihhruaina vangin tournament hi a khel thei lo.

Grand Slam vawi 21 champion tawh Djokovic chuan, "Thu thar ka hriat chuan min ti lawm takzet," a ti. Nikuma dan a bawhchhiat vang khan kum 2025 thleng Australia tlawh thei lo tura tih lailawk a ni a, mahse an thutlukna hmasa hi an siam danglam.

ATP Finals khelh laiah Djokovic hian Nilaini zan khan an group match hnihna a khel a, seeded parukna Andrey Rublev chu 6-4, 6-1 in an sawp, a match hmasa zawkah Stefanos Tsitsipas a lo hneh tawh bawk a, khelh hmabak pakhat nei chungin semifinal a lut fel tawh.