Argentina an phur zual zel

Lionel Messi an neih avangin Argentina an phur a, tun hnaia an khelh ṭhat tluan em avangin an phur zual bawk. South American ram hian World Cup inbuatsaihna hnuhnung atan UAE an hmachhawn a, 5-0 in hnehna an chang.

Nilaini zan friendly match inkhelah Argentina tan Messi-a'n goal a khung bakah Julian Alvarez tan a siamsak a, keeper chauh a hmachhawn tawhah Messi hian Manchester City striker hi a siamsak ta zawk.

Angel di Maria-a'n ball kang lai a hlap lut a, mawi tak a ni. Juventus winger hian goal dang a khung bawk, a dam chiang tih lantir nan goal hnih a khung - ani bakah hian Joaquin Correa chuan a khung belh bawk.

Argentina coach Lionel Scaloni-a'n minute 90 chhung Messi a khelh tir a, an captain hian ram tan match a khelh hnuhnung pangaah goal 10 a khung, inrintawkna sang tak nen World Cup a khel dawn chiang.

Tottenham Hotspur defender Cristian Romero erawh a hliam dam tawh mah se a la inkhel lo. Tlarhnung laiah Nicolas Otamendi leh Lisandro Martinez te dah an ni - World Cup an khelh hunah Scaloni-a'n tute pahnih nge a inkawptir ang tih sawi thiam a harsa.

World champion vawi hnih ni tawh hi tun dinhmunah match 36 chhung tlawm nei loin an kaltluang mek. World Cup an match hmasa ber atan November 22, Thawhlehni tlaiah Saudi Arabia an hmachhawn ang.

Argentina midfielder Rodrigo de Paul chuan, "Kan inringtawk hle, chu tih rualin player tam zawk tan World Cup hmasa ber a ni dawn, chuvangin match hmasa ber hi a pawimawh dawn hle," tiin a sawi.