Germany tan mi thar Fullkrug

Mi tam takin Niclas Fullkrug hi an la hre lo mai thei. Nilaini zan khan Fullkrug hian Germany tana a match hmasa ber a khel a, an ram tan hian goal khung nghalin Oman lakah 1-0 in hnehna a chanpui. Fullkrug hian kum 29 a nih hnuah Germany tan a khel ve chauh a, season liam ta khan 2. Bundesliga-ah a la khel a ni.

Hansi Flick-a enkawl Germany lamin inkhel an thunun a, mahse Leroy Sane leh Kai Havertz awmna team hian goal khung an harsat, bench aṭanga lut Fullkrug hmangin an chak hram, ani hi Werder Bremen forward niin Bundesliga season kal laiah goal 10 a khung tawh.

World Cup an khel dawn tawh a, inbuatsaihna hnuhnung berah pawh Germany hian tlarhma lam an la in en chhin. Kum 17 mi Youssoufa Moukoko chu tlarhma laiah dah niin, ram tana a match hmasa berah remchang nei mah se goal ban a tih per.

Germany khingpui hi Oman a nih miau avangin goal chhuah loh ringawt hi lawmna tur a ni lo a, an khingpui hian goal ruakah an khung lo tih hriat a ṭha bawk. Flick-a hote hian Qatar ramah fiahna tak tak an hmachhawn ang.

Group E-ah Japan, Spain leh Costa Rica te nen an awm khawm. November 23, Nilaini zan dar 6:30-ah Japan nen an match hmasa ber an khel dawn, inkhel awlsam a ni lo mai thei.