Zaninah league hmahruaitu leh champion lai Chhinga Veng Vs Chanmari
Mizoram Premier League-ah Chanmari FC-in sulhnu an nei ṭha a, an khingpui tur Chhinga Veng FC erawhin tun hma chanchin sawi tur nei lo mah se tun season-a team ṭha ber an ni.
Zanin dar 7:30 hian H. Vanlalthlanga enkawl Chanmari FC leh Lalsangzuala Hmar kaihhruai Chhingcows an inkhel dawn a, en man hi Rs 50 chauh a ni a, kum 14 hnuai lam tan a thlawnin a en theih.
Tu nge champion lai?
Chanmari FC hi champion lai an ni a, amaherawhchu Chhinga Veng hian Chanmarians champion puitu coach Sanga bakah player pawimawh captain Lalrinchhana Tochhawng, Malsawmfela, R. Malsawmtluanga, Lalrinchhana leh Ramfangzauva te an la vek.
Hei vang hian Chanmari hi hming lian zawk an ni nachungin Chhingcows lam hian belhchian an dawl zawk a, MPL5 nomawi chawitu zinga player pawimawh an kawl tam zawk bawk.
Hetihlai hian Chhinga Veng coach Sanga erawhin Chanmari hi an ṭha tawk tih a sawi thung.
Chhingcows boss Sanga chuan, "Chanmari hi an ṭha. An player-te hi an naupang tiin an sawi fo a, amaherawhchu MPL-ah chuan an nau tawh lo. Tawnhriat nei ṭha tak tak an ni. Season liam taa kan champion ṭum pawhin Ṭhasiama, Muanzoa, Muanawma leh Rosanga te hi player pawimawh vek an ni," tiin an khingpui tur chungchang a sawi.
Engtin zel?
Sanga hian MPL-a Chanmari FC a champion pui zawh hnuin Chhinga Veng a zawm a, MFA Super Cup leh I Day Football-ah te a champion pui nghal.
Hei chauh hi ni loin, I Day Football-ah Chanmari hi group stage-ah 5-1 in an sawp a, final-ah 2-1 in an hneh leh bawk.
Chhinga Veng hian MPL-ah pawh Chanmari hi ṭum hnih an hneh a, champion lai tan chuan an result hi lak nat loh theih loh a ni. A chhan chu Chanmari hian nomawi chawi nawn tumin MPL2-a champion puitu coach H. Vanlalthlanga an lalut a, amaherawhchu tualchhung football-ah veteran coach Thlanga a awl rei avangin player lak khawm kawngah a che ṭha tawk lo.
Chhingcows hian semifinal hmaa Chanmari vawi li an hneh tawh avangin zaninah pawh Chhinga Veng hi rinkai zawk an ni.
Chanmari nge nge!
Chanmari hian Thlanga hnuaiah hun pawimawhah result ṭha an nei ṭhin. Semifinal an thlen theih chhan pawh hi an huaisen vang a ni. League round-ah Ramhlun North nena an inkhelh ṭumin an beidawng duh lo a, a tawpah vanneihna nen semifinal an thleng.
Knockout stage chinah chuan coach tawnhriat hi danglamna a ni thei dawn. Chanmari FC boss Thlanga chuan, "Semifinal khel tur hian kan inpeih tawh a, minute 180 chhung concentration hloh miah loa kan khelh a ṭul dawn a ni. Chhinga Veng chu team ṭha zawk an ni ngei a, amaherawhchu kan dang thei a ni," tiin Vanglaini a hrilh.
Santosh Trophy-a Mizoram champion puitu coach Thlanga chuan, "Game hmuhnawm khelh kan tum. Kan tihfuh chuan kan pet goal ṭeuh thei a, Chhinga Veng hian min sawp thei bawk. Kan result hi ka naute kutah thui tak a innghat a ni," tiin football mawina phochhuah ngei a tum thu a sawi.
Tun season-a an intawn tawhna
I Day Football 2017
Group Stage
Chanmari FC 1 - 5 Chhinga Veng
CFC : Rochhingpuia 75' (P)
CVFC : Malsawmfela 11'; MS Dawngliana 21', 46';
Laldampuia 61', 86'
Final
Chanmari FC 1 - 2 Chhinga Veng
CFC : Jakob Vanlalhlimpuia 2'
CVFC : Lalrammuanpuia 56' ; MS Dawngliana 101'
MPL6
Chhinga Veng FC 1 - 0 Chanmari FC
CVFC : Lalkhawpuimawia 59'
MoM : Lalrinchhana, CVFC
Chanmari FC 1 - 2 Chhinga Veng FC
CFC : Joe Zoherliana 12'
CVFC : MS Dawngliana 64', 76'
MoM : MS Dawngliana, CVFC