MBL-ah champion thar awm dawn
Hrangbana Memorial 3rd Mizoram Badminton League final chu zanin 7:30 hian Electric YMA Hall-ah team thar pahnih Southern Acers Siaha leh Zotlang Rockets ten an khel dawn.
Siaha hian final lut turin Nilai zan khan champion lai Tuikual Shuttlers chu 3-0 in an hneh a, an khingpui tur Zotlang hian 3-0 thoin Mission Veng an hneh bawk.
Team ṭha 2
Zotlang leh Siaha te hian final lut turin an khingpui an hneh vek a, team ṭha pahnih an ni. MBL team tharte hian state pawn player an la fuh a, state pawn aṭanga an lakluh Kiran B (Zotlang) leh Akshit Mahajan (Siaha) ten an khingpui an la hneh vek.
Kiran B hi junior player a nih avangin men's singles 1-ah a luh a ngai lo a, Zotlang player Kiran hi Mizo shuttler ṭha Samuel Lalnunmawia leh Zarzokima te hneh thei a ni. Siaha player Akshit Mahajan hi BAI ranking-ah 89-na ni mah se amah aia ranking sang zawk Lalhlimpuia (Puipuia) (BAI - 88) an kawl avangin men's singles 1-ah a khelh kher a ṭul lo bawk.
Final sequence hi U19 BS, MS-1, MS-2, MD leh XD a ni a, player inrem fuh a pawimawh khawp ang.
Final chu...
Match hmasa bera khelh tur U19 BS-ah Kiran-a tan harsa tur awmin a lang lo a, Zotlang-in hma an hruai nghal a rinawm. Match a dangah erawh Siaha inrem dan tur hriatthiam a harsa - amaherawhchu Mission Veng tlangval Puipuia'n Mizoram number 2 Samuel-a a hneh avangin MS-1 a inlan a rinawm a, Zotlang hian league round-ah MS-1 ah hian mi hran
ṭheuh luhtirin chak an nei lo.
MS-2 ah Siaha-in Akshit an luhtir ngam chuan Kiran nena an inkhel tur hi a hmuhnawm dawn. Match lina men's doubles khelh zawha chak zawk tur a la hriat loh cheu chuan mixed doubles a hmuhnawm khawp ang.
XD-ah Zotlang tana inkawp R. Lalbiaksanga leh F. Vanlalhriatpuii te ang thoin Siaha tana inkawp Akshit leh Lalvenhimi te an la chak vek. Tualchhung badminton ngainatute chuan mixed doubles en tur awm thei se tih hi an duhthusam tur a ni.