Atletico beiseina la chuai lo ; A thiam 16 zingah Chelsea a chiang

Champions League group ngaihnawm ber tura ngaih Group C chu beisei ang ngeiin a ngaihnawm chho zel - Atletico Madrid-in beisei an neih chhunzawm ve zel a, Chelsea-in last 16 an lut chiang tawh thung.

AS Roma-in draw result nen last 16 lut thei mah se Atletico Madrid mualah chak result an hlawh chhuak zo lo a, Spanish club hian an beiseina chhi nung turin Roma hi 2-0 in an lo hneh. Chelsea-in khualmualah goal khung an thiam tih an pholang bawk a, Qarabag chu 4-0 a hnehin a thiam 16 zingah an tel ta.

Griezmann a thiam

A match hnuhnung pariatah goal a khung tawh loh hnuin a hunah tak Antoine Griezmann-a'n a thiam a la theihnghilh lo tih a pholang a, French forward hian minute 69-naah Angel Correa hnen aṭanga a ball hmuh chu invawrh kang chungin mawi zetin a volley goal - Roma player tan tih theih a awm lo a, dan rual loha goal ropui a ni.

Minute 88-naah Ke­vin Gameiro chuan an goal hnihna a khung chhunzawm ve leh bawk a, Filipe Luis leh Griezmann te nen ball an inpek kual hnuah goal hi a khung - Atletico Madrid hian last 16 lut turin an match hnuhnung berah Chelsea an hneh ngei a ṭul dawn a, Roma leh Qarabag inkhel turah an innghat tel bawk ang.

Chelsea = goal

Premier League cham­pion-in Qarabag khel­mualah goal khung turin harsatna an tawk lo a, goal li ngawt khungin hnehna an chang - Qarabag captain Rashad Sadygov chu minute 19-na lekah Willian a tihtluk avangin hnawhchhuah a ni a, penalty a chawi zui bawk. Eden Hazard a lo pen chhuak a, goal-a chantir turin harsatna a nei lo.

Willian bawk a langsar chhunzawm - Brazilian forward hian minute 36-naah a goal hmasa zawk a khung a, minute 85-naah a chhunzawm bawk. Willian hian a goal khung inkarah penalty a hlawh chhuak bawk a, Cesc Fabregas chuan goal-ah a chantir.