Celtic lakah PSG-in goal sur tir

Paris St-Germain chuan Champions League nomawi chawi an tum ngam tih an lantir leh ta. French Ligue 1 club hian Nilaini zan khan an mikhual Celtic chu 7-1 a sawpin Group B hmahruaitu an ni chiang tawh, inkhel dangah Bayern Munich chuan Anderlecht 2-1 in an hneh bawk.

Goal a sur

Parc de Princes-a inkhelah Brendan Rodgers-a nauten rin loh tak maiin minute khat pawh a liam hmain goal an khung, Moussa Dembele chu tun Champions League group stage bikah PSG goal-a chhuih lut thei hmasa ber a ni.

Celtic striker Moussa Dembele goal khung hi Scottish club tan lawmawm viau mah se an khingpui chhaih thinrimtu mai a ni. Ligue 1 hmahruaitu PSG hian khawvel player manto ber Neymar-a goal hnih hmangin an changlet a, chawlhlawk hmain Edinson Cavani leh Kylian Mbappe ten khung belhin first half a zawh meuh chuan 4-1 in hma an hruai let der tawh.

PSG hian an la duhtawk lo, Marco Verratti, Cavani leh Dani Alves ten an khung belh, an goal hnuhnung pathum (75', 79', 80') hi minute nga chhunga lut vek a ni; PSG hian Champions League match bika an chak chian ber ṭum an tawng a, Celtic erawhin Europe club te inelna sang berah hian a vawi hnih nan match khatah goal sarih an chhuah thung.

Unai Emery enkawlna hnuaiah PSG hian match nga khelhah goal 24 an khung tawh a, anni aia khung hnem an la awm lo; anmahni lamah goal khat chiah a la lut bawk. PSG manager chuan, "Celtic goal khung kan thaibo sak thei a, a lawmawm hle. Kawng ṭhenkhatah hmasawnna tur kan la nei a, a khaikhawm nan chuan kan khel ṭha hle a ni," a ti.

Spanish manager Emery chuan sawi zawmin, "Cavani-a'n club tana a goal 150-na a khung a, Neymar leh Mbappe te pawhin an khung belh zel bawk, kan tlarhma an hriam ṭha hi kan vannei takzet," tiin a hmatawng pathumte a chhuan thu a sawi.

Bayern an lawm lo

Group B inkhel dangah German champion Bayern Munich chuan Robert Lewandowski leh Corentin Tolisso te goal hmangin Anderlecht chu 2-1 in an hneh. Bayern Munich fan chuan inkhel entura pawisa an chawi hnem vanga an lungawi loh lantir nan khelmual chhungah pawisa lem an thehlut nasa hle.

Belgium khawpuia a awm Constant Vanden Stock Stadium-a inkhel enturin Bayern ṭantute hian £88 (Rs 7,595) vel zel an chawi a ngai a, Germany aṭanga zin chhuak fan ten to an ti hle. Bayern ṭantute hian season hmasa a Arsenal nen an inkhel en man ticket to an tih avangin an lungawi lohna an lantir tawh bawk.

Bundesliga hmahruaitu Bayern Munich hian point 12 hmuin an group-ah pahnihna an ni a, match khat khelh tur la awmah hnehna chang pawh ni se an chunga awm PSG an umphak thei tawh lo. Last 16-ah chuan group dang hmahruaitu an hmachhawn a ngai dawn tihna a ni.

Bayern manager Jupp Heynckes chuan, "First half-ah khan hun ṭha vawi thum kan hlah a, kan khel ṭha lo hle. An khelmualah chuan Anderlecht hi team tawhkhirh tak an ni a, harsa taka goal hnih kan khung thei kha a vanneih thlak hle," a ti. German manager hian Thiago Alcantara chuan a tihrawlah hliam a tawrh thu a sawi a, winger Arjen Robben erawh a hliam nat loh thu a sawi tel bawk.