MPL6 Under 18-ah Chhinga Veng leh Dinthar ten final thleng

Mizoram Premier League Under 18-ah champion thar an awm dawn.

Nimin Lammual in­khelah Chhinga Veng-in champion lai Bethlehem Veng­thlang 4-1 in an sawp a, Dinthar FC-in Mizoram Police 1-0 in an hneh ve bawk.

Nomawi inchuhna hi Novem­ber 25, Inrinni zan dar 7:30 hian Lammualah khelh a ni dawn a, MPL Under 18-a la champion ngai lo Chhingcows leh Mai­mawms te an inhmachhawn ang.

Chhinga Veng coach H. Lalremruata'n BVT an hma­chhawn hmain league round-a Bethlehem Vengthlang an hneh loh dan chu an vanduai vang a nih thu a sawi lawk a, Remruata thusawi dikna semifinal-ah a lang.

Chhingcows hian R. Savapna Jeevan Ratna hmangin minute 17-naah hma an hruai a, first half tawp hmaa BVT defender handball vanga penalty an hmuh avangin dinhmun ṭha tak­­ah an ding. Penalty hi F. Lal­nuntluanga'n goal-ah a chantir a, halftime-ah 2-0 a ni.

Second half-ah S. Beirahropha leh Tluanga ten Chhinga Veng tan an khung belh a, Bethlehem VT tana Lalruatkima khung chu mualphona tiziaawmtu chauh a ni. BVT-in an midfielder Lalchhantluanga hrem an tuar a, final luh phu zawk Chhinga Veng an chak.

Beiseina nen Dinthar
Dinthar FC-in season tharah MPL an khel dawn lo a, Under 18 team lamin season kharna erawh siam ṭhat an tum hle. Nimin tlai inkhelah Maimawms hian vawi hnih champion tawh Mizoram Police Under 18 chu 1-0 in an hneh.

Police hian ṭan phat aṭangin inkhel an thunun a, Dinthar an bet hle. Goal a luh lawk loh avang­in Maimawms an insiamṭha hman a, Dinthar hian inkhel thunun chhunzawm mah se goal an khung thei bik lo.

Minute 90-naah Din­thar forward Lalmal­sawm­tluanga'n ball ṭha taka a lakluh hnuah box chhunga awm Samuel Vanlalhlana tan a siam sak a, ani hian chakna goal khung nan a hmang.

Maimawms hian MPL kum bithliah inelna hmasa paliah final an thleng vek a, tun hi an vawi nga final luhna niin nomawi chawi tawh ngei an tum ang.

Semifinal Results
Bethlehem VT 1 - 4 Chhinga Veng
BVT : Lalruatkima 82'
CVFC : R. Savapna Jeevan Ratna 17';
F. Lalnuntluanga 45', 82'; S. Beirahropha 63'
Mizoram Police 0 - 1 Dinthar FC
DFC : Samuel Vanlalhlana 90'