Delhi mawina Lallianzuala Chhangte

Indian football-ah Mizo hming a mawi leh ta - Nilaini zan khan Delhi Dynamos chuan 3-2 in FC Pune City an hneh a, Lunglei rawlthar Lallianzuala Chhangte chu 'Hero of the Match' ah thlan a ni.

India tana a inlan hmasak bera goal hnih khung thei rawlthar hian minute 46-naah Paulinho Dias goal khung tur a siamsak a, minute 10 hnuah ISL-a a goal hmasa ber a khung zui bawk - Delhi Dynamos ṭantuten Lallianzuala hming an hre reng tawh ang.

Mizo tamna

Pune City-in Mizo pahnih Lalchhunamawia Fanai leh Isaac Vanmalsawma te an kawl a, Lengpui tlangval Chhuantea'n Pune tan inkhel bul ṭan nghal mah se Hnahthial tlangval Isaac tan erawh Real Zaragoza boss hlui Ranko Popovic enkawlna hnuaiah hmun a la awm rih lo.

Delhi Dynamos-ah Mizo pahnih Lalhmangaihsanga Ralte leh Lallianzuala Chhangte te an awm a, Real Madrid tec­hni­­cal director hlui Miguel Angel Portugal chuan North Mualcheng tlangval Sena leh Lianzuala te hi inkhel bul a ṭan tir nghal a, season hmasaa Aizawl FC goalkeeper Albino Gomes chu Delhi club tana si ban nghaktu a ni bawk.

Lianzuala a lian

Pune City-in an mualah an khelh avangin hnehna chang tura beisei an ni a, an beisei ang ngawt erawh a thleng lo. Goal lut loa chawlhlawk hman a nih hnuah Delhi lamin an theihna an pholang ṭan a, Lallianzuala a langsar - DSK Shivajians-Liverpool academy chhuak hian minute 46-naah Paulinho Dias goal khung tur a siamsak a, minute 54-naah a khung ve zui bawk.

Delhi-in an la duhtawk mai lo - Matias Mirabaje chuan minute 65-naah goal mawi zet a khung a, Uruguayan attacking midfielder goal khung hi goal 'class' sang tih loh rual a ni lo. Pune-in an muala tlawm duh loin Emiliano Alfaro leh Marcos Tebar hmangin an si phurh rawn sut ṭhen mah se an harh a tlai a, Delhi an chak.

Pathian vang a ni

Lallianzuala Chhangte-in DSK Academy-a awm laiin India senior team tan goal a khung tawh a, season hmasa ISL-ah beiseina sang tak nen NorthEast United pan mah se a beisei ang hmun erawh a chang lo - Delhi a pan a, match hmasa berah inkhel bul a ṭan a, goal leh assist a nei bawk.

Lunglei rawlthar chuan, "Pathian khawngaihna avanga tun dinhmun thleng thei ka ni a, a chungah ka lawm a ni. Engkim hi Pathian kuta awm a ni a, theihtawp ka chhuah zel ang," tiin Vanglaini a hrilh a, tun chu a tan bul ṭanna chauh a la nih thu a sawi.

Mimal Lawmman
Moment of the Match Matias Mirabaje, Delhi Dynamos
Winning Pass of the Match Lallianzuala Chhangte, Delhi Dynamos
Emerging Player Sarthak Golui, Pune City
Hero of the Match Lallianzuala Chhangte, Delhi Dynamos