Goal khung lo Barca-in last 16 lut

Barcelona-in Champions Lea­gue group stage match-a a vawi hnih nan goal khung lo mah se hmahruaitu nichungin last 16 an lut chiang tho a, Nilaini zan khan Juventus nen 0-0 in an inhnehtawk.

Catalan club hian kum nga hnua Champions League-a goal an khung loh vawi khatna ni turin Olympiakos chu goal khung loin an lo inhnehtawkpui tawh a, Juventus khelmualah a danglam tam lo - goal khung loin an ṭin.

Turin khawpuia Allianz Sta­dium-a inkhelah hian Barcelona tan Croatia midfielder Ivan Rakitic chuan post a pet per a, France left-back Lucas Digne-a'n awlsam taka goal a khung theih laiin Uruguay forward Luis Suarez a duhsak a, Liverpool striker hian goal-ah a chantir thei lo.

Minute 56-naa Everton winger hlui Gerard Deulofeu thlaktu Messi-a'n hun duhawm a nei bawk a, mah se Argentine forward hian freekick atangin bar chung chiahah a pet.

Juventus tan Paulo Dybala a khel ṭha takzet a, mah se a hmaa ding Germany keeper Marc-Andre ter Stegen a nih avangin a vannei tawk lo - vawi li ngawt shot a nei chungin goal-ah a chantir thei lo.

La Liga hmahruaitu Barcelona hian point 11 hmuin hmahruaitu an nichiang tawh a, Barca hi an match hnuhnung berah chak loin an hnuai chiaha awma point riat hmutu Juventus hian point thum hmuh belh pawh ni se head-to-head ah an chungnun avangin hmahruaitu an ni dawn tho a ni.

Hetihlai hian Juventus hi hah­dam taka awm thei an la ni lo - an hnuai chiaha awm Sporting Lisbon chuan 3-1 a Olympiakos an hneh avangin point khat chiahin Serie A champion hi an tluk lo mek a, Juve tan last 16 lut chiang turin an match hnuhnung berah Greek club Olympiakos hneh ngei a ṭul ang.

Barcelona boss Ernesto Val­verde chuan, "Bench lama Lionel Messi hun hman tir chu thil harsa tak a ni. Mahse, tun season-ah a inkhelh hnem avangin Juventus nena kan inkhel a hautak dawn si a, a chawlh hahdam hi a tan a ṭha berah kan ngai a ni," tiin an thiampuipa bench lama a dah chhan a sawi - Barca hian Pathianni zanah La Liga-a an hnuai chiaha awm Valencia an lenchilh dawn.