Kan fimkhur a ṭul ang - Claude Puel

Leicester City boss Claude Puel chuan zanin dar 1:30-a West Ham an lenchilh hunah fimkhur a ṭul tur thu a sawi. Hammers hian an coach Slaven Bilic banin David Moyes an lalut a, Manchester United boss hlui enkawlna hnuaia an match hmasa berah Watford chu 2-0 in an ngam lo.

Puel chuan, "Moyes hnuaia an match hmasa berah an tlawm avangin fan-ten hnehna chan ngei an duh tawh dawn a, kan fimkhur a ṭul dawn a ni. Hammers hi kan hrechiang a, an khelmualah chuan an theihna ang taka khelhchhuah an duh dawn a ni," a ti a, tun hnaia talbuai Leicester chu zuam ngawt chi an nih loh thu a sawi.

Foxes manager chuan sawi chhunzawmin, "Club-in manager thar an nei a nih chuan an manager thar hnuaiah hmun pawimawh chan duhin player zawng zawngin an theihtawp an chhuah vek a, hei vang tak hian coach thar hnuaia khel team tum hi a hautak phah ṭhin," a ti.

French manager chuan Moyes chu duhsakna hlan nghalin, "Moyes hi season hmasaa Sunderland a enkawl lai aṭang khan ka hrechiang tawh a, a team leh amah hi duhsakna ka hlan - zaninah erawh duhsak thei ka ni lo," a ti a, London Stadium-ah hnehna chan ngei a duh.