Anfield-ah Premier League champion Chelsea
Chelsea-in Champions League-ah last 16 an lut tawh a, Liverpool-in match khat an la hmabak thung - zanin dar 11:00-ah Europe-a inkhel zo hlim, result in ang lo team pahnih an inhmachhawn dawn a, inkhel a hmuhnawm dawn.
Liverpool sulhnu ropui zia hrilh nawn kan ngai lo a, Chelsea-in tun hnaia English football-a hming an chher dan lah ziah nawn a ngai hek lo. Anfield-ah team pahnihin chungnung zawk nih an inchuh dawn a, Premier League champion beisei ngam an nih ve ve avangin zanin inkhel tur hi point thum hlawhchhuahna inkhel a ni satliah lo a, point thum inchuhsakna inkhel a ni tel nghal.
Chelsea an hah
Blues-in khualmualah Champions League khelin Qarabag chu 4-0 ngawtin an sawp a, zaninah Liverpool lenchilh lehnghal an ngai. Chelsea boss Antonio Conte-a'n an fixture a tawt avangin a naute an chauh thu a sawi a, Football Association chu Premier League fixture an duan danah an ngaihtuahna seng nawn turin a ngen hial!
Chelsea manager Conte chuan, "Media hoin fixture siam danglam tura min puih kan ngai hialin ka hria. English league hi a harsa a, nomawi beisei ngam team paruk kan awm. Darkar nga vel chau takin zinkawng kan zawh a, Liverpool hmachhawn leh nghal a ngai tur hi chu hriatthiam a har a ni," tiin a naute an chauh thu a pha lo.
Inbuatsaihna Ṭha
Chelsea boss Conte-a'n Liverpool an hmachhawn tur a ngai thutak a, Champions League-a Qarabag an hneh zan khan, "Thudik tak chu hei hi a ni. Liverpool hmachhawn turin ka staff-te nen a hma daih aṭang khan kan inbuatsaih tawh a ni," a ti.
Conte chuan Sevilla laka 3-0 a hma an hruai hnua an si phurh sut zawhtirtu Liverpool inkhel a en thu sawi nghalin, "Sevilla nena an inkhel kha ka en a, first half-a Liverpool inkhel kha chu hmuhnawm tak a ni. Mahse, football chu hriatthiam a harsa a, beisei loh thil a thleng fo ṭhin," tiin zanin an inkhel turah pawh chak chiang sa an awm loh thu a sawi.
Hriatthiam har Reds
Liverpool-in goal khung an thiam tih hai rual a ni lo - inelna hrang hranga an match hnuhnung pangaah goal thum aia tlem lo zel an khung a, an buaina erawh tlarhnung a ni. Tun season-a inelna hrang hranga match 20 an khelh tawhah goal 28 ngawt an chhuah tawh a, Alvaro Morata leh Eden Hazard neitu Chelsea lakah an fimkhur a ṭul ang.
Reds chakna erawh hei hi a ni - top six club ho lakah season hmasa khan match 10 ngawt chu an tlawm lo. Liverpool hi an tlawm a nih chuan hmahruaitu Manchester City-in Pathianni zan dar 9:30-a Huddersfield an hneh bawk chuan City aiin point 14 ngawtin an hnufual ang a, pathumna ni mek Chelsea hi point rukin an thlau bawk ang. Chumi awmzia chu Reds hi an tlawm a nih chuan champion beiseina an paih bo a ngai dawn tihna a ni.
Thawnthu hlui
Premier League-ah team pahnih hi vawi 50 an intawng tawh a, an inhnehtawk hle - vawi 19 ve ve hnehna an chang a, vawi 12 an inhnehtawk. Mahni mual hman thiam lamah pawh an inbuktawk hle - Chelsea-in Stamford Bridge-ah Liverpool vawi 13 an hneh a, Reds-in Anfield-ah vawi 13 vek an hneh ve bawk!
Liverpool-in Premier League-a Chelsea an hmachhawn hnuhnung pangaah vawi hnih hnehna changin vawi thum an inhnehtawkpui a, an tlawm miah lo. Chutihruala Blues fan-te tana hriat nuam chu Anfield an lenluh hnuhnung pangaah an tlawm bik lo - vawi hnih hnehna changin vawi thum an inhnehtawk.