Zaninah I League khel dawn
India rama football inelna sang ber I League chu vawiin tlai dar 5:30 hian khelh ṭan a ni dawn a, Minerva Punjab chuan Mohun Bagan an mikhual ang. Kolkata club Bagan-ah hian Mizo tlangval Ricky Lallawmawma a awm a, Durtlang pa hian Calcuta Football League aṭang khan Kolkata club tan hian a khel tawh.
Season dang zawngah I League club ten ram pawn player pali bak an nei thei lo a, tun season-ah parukah tihsan a ni. Ram pawn player paruk zinga pahnih chu Asian player a ni tur a ni thung. Mohun Bagan hian an player chhuanvawr Sony Norde chu ISL club tam takin an sawm karah an chelh thei a, I League hman zawh taka top scorer Aser Pierrick Dipanda an kawl tawh bawk.
Bagan hian I League-a Aizawl FC champion puitu Kingsley Obumneme an lalut tawh bawk a, Aizawl FC player hlui tho Yuta Kinowaki an kawl bawk. Porto youth system chhuak Diogo Ferreira hi player langsar ni phak tura beisei a ni.
Minerva Punjab-in Bagan angin foreign player hriat hlawh tia sawi tur an kawl lo a, Bhutan international Chencho Gyeltshen hi pre-season a Bengaluru FC lama hattrick siamtu kha a nih avangin en bik a sual a rinawm loh a, Belarusian forward Dzmitry Kowb hi hmuhnawm tura beisei a ni bawk.