Zanin 7:30-ah MPL Under 18 final Chhinga Veng Vs Dinthar FC

Mizoram Premier League Under 18 final chu zanin dar 7:30 hian Lammualah khelh a ni dawn a, la champion ngai lo Chhinga Veng leh Dinthar FC an inhmachhawn dawn.

Chhingcows hian final lut turin champion lai Bethlehem Vengthlang FC chu 4-1 in an sawp a, Dinthar FC-in vawi hnih champion tawh Mizoram Police chu 1-0 in an hneh. MPL Under 18-ah hian best goalkeeper, best defender, best midfielder leh best forward te thlan a nih dawn bakah fair play team thlan a ni bawk ang.

Final-ah Dinthar

MPL aṭangin Dinthar FC an relegate a, Maimawms U18 tan kumin hi champion-na hun ṭha a ni thung. MPL kum bithliah inelnaah Dinthar FC hian vawi nga final an lut tawh a, season liam ta chiah khan a tawp khar lo mah se vawi khatmah nomawi an la chawi lo.

Maimawms hian final lut tur hian league round-a 5-0 ngawta anmahni sawptu Police an hneh let thei a, coach Lallawmkima (Tea) hoin champion an tumruh hle. Amaherawhchu, Dinthar hmabak a la har dawn a, final-a an hmachhawn tur Chhinga Veng pawh hi an match hmasa berah 4-0 in an hneh tawh lo.

An inkhelh tawhna thlir chuan Chhinga Veng hi champion mai tur ni mah se Police coach Lalramhluna ngaihdan a dang. MPL U18 vawi hnih chawi tawh coach Hluna chuan, "Dinthar hi 5-0 in kan sawp a, semifinal-ah khan chak zawk tura ngaih kan ni. Amaherawhchu kan khel fuh lo a, kan hneh lo. Final-ah pawh hian chak chiang a awm lo, football a ni tlat," tiin Chhingcows chak chiang bik loh thu a sawi.

Dinthar tan hian goal li khung tawh Lalmalsawmtluanga bakah Lalthlamuana (3 goals), Samuel Vanlalhlana (2 goals) leh Vanlal­muanpuia (2 goals) te an pawimawh dawn a, team ṭha lo zawk tur an nih avangin keeper RS Lallawmzuala a che ṭhat a ṭul bawk ang.

Kum ṭha

Chhinga Veng senior team-in league hmahruaitu ni chungin semifinal an lut a, Under 18 team-in palina nichungin knockout stage thleng mah se hmahruaitu Bethlehem VT an sawp thei a, champion tura rinkai an ni.

Chhingcows U18 player-te hian MPL U18 bakah Aizawl DFA first division league-ah Zo United tan an khelh kawp avangin league round-ah an che ṭha tawk lo a, hei vang hian semifinal-a an result ṭha pawh hi a mak lo.

League round-ah Chhinga Veng hian goal 22 an khung a, goal sarih chiah an chhuah a, hemi kawngah hian anmahni elpha an awm lo. Dinthar FC nen an intawn hmasak ṭuma hattrick siamtu F. Lalnuntluanga'n goal sarih a khung tawh a, goal li khung tawh S. Beirahropha, C. Beithatlo leh Lal­hmingmuanpuia te an kawl bawk.

Chhinga Veng tana kum 2017 hlutna a san lehzual nan zanin hian chak a pawimawh. Chhinga Veng hian veng leh veng inelna NECS Cup an champion hnuah an veng club Chhingcows-in MFA Super Cup leh I Day Football an chawi tawh a, MPL an beisei mek bawk.

Final Kalkawng
Chhinga Veng
League Round
Chhinga Veng 4 - 0 Dinthar FC
Chhinga Veng 0 - 1 Bethlehem VT
Chhinga Veng 1 - 3 Aizawl FC
Chhinga Veng 2 - 1 Chanmari FC
Chhinga Veng 6 - 0 Ramhlun North
Chhinga Veng 1 - 2 Mizoram Police
Chhinga Veng 8 - 0 Chanmari West
Semifinal
Chhinga Veng 4 - 1 Bethlehem VT
Dinthar FC
League Round
Dinthar FC 0 - 4 Chhinga Veng FC
Dinthar FC 2 - 1 Aizawl FC
Dinthar FC 3 - 0 Chanmari West FC
Dinthar FC 3 - 3 Bethlehem VT
Dinthar FC 0 - 5 Mizoram Police FC
Dinthar FC 2 - 1 Chanmari FC
Dinthar FC 2 - 1 Ramhlun North
Semifinal
Dinthar FC 1 - 0 Mizoram Police