2-2! Minute 90 dang a la awm
Mizoram Police-in an huaisen rah sengin I League champion Aizawl FC an chelh. Ningani zan Mizoram Premier League semifinal first leg inkhel hmuhnawm tak chu 2-2 in a tawp. December 4, Thawhṭanni zanah minute 90 dang khelh chhunzawm leh tur a ni.
Goal li
Police forward F. Lalrinpuia shot-cross chu minute 7-na lekah a goal nghal a, AFC keeper Avilash Paul chu mawhphurtu a ni.
Aizawl FC an insiamṭha a, goal khungtu erawh an defender-te an ni. Minute 22-naah Masih Saighani-a'n a tauh goal a, feet ruk leh inches hniha sang defender hian MPL-ah goal li a khung tawh.
Police lamin Masih an la veng uluk chuang lo a, minute 85-naah Afghan defender tauh chu keeper Lalṭanpuia'n dang perin Lalhriatrenga'n chiang zetin a pet goal.
AFC chak turah an inngai a, amaherawhchu beidawng duh lo Police tan Lalfakzuala'n injury time minute linaah siphurh sutna goal a khung. Armed Veng tlangval Fakzuala volley hmasa chu defender Masih-a'n dang mah se a per let chu volley nawn lehin a ruak lai awmchhunah mawi zetin a lut.
Squad a chhah
Aizawl FC-in hliam vangin Romanian midfielder Andrei Ionescu bakah S. Malsawmtluanga, Rochharzela leh Jonathan Lalrawngbawla te an chhawr thei lo.
Player awm lo thlirin MPL club tam tak tan buaina tham tling mah se AFC erawh player ṭha rual an la rem thei a, first half-a inkhel thununtu zawk pawh an ni. Winger pahnih H. Lalmuankima leh Albert Zohmingmawia ten Police wing back TC Vanlalhruaia leh Zomuanpuia te an chhaih buai hneh hle.
Bawngkawn tlangval MK-a'n goal ban a pet per bakah William Lalnunfela leh David Lalrinmuana ten chance ṭha an hlah bawk. AFC-in set piece an hmang thiam a, an goal pahnih hi captain David-a ke aṭanga chhuak a ni a, Zemabawk North tlangval hi man of the match-a thlan a ni.
Aizawl FC hian MPL6-ah goal 33 an khung tawh a, heng goal te hi player 12 khung a ni a, an squad a chhah tih hai rual a ni lo.
Police an rum
Mizoram Police-in tharum an hmang nasa a, ball chang tura an theihna zawng zawng an chhuah zel avangin Aizawl FC lamin an duh angin ball an inpe kual thei lo.
Police striker Fakzuala goal khung tura dah a nih angin siphurh sutna goal a khung a, hei bakah hian Aizawl FC defender-te'n ball an sem theih loh nan a chuh na hle bawk. Armed Veng tlangval Fakzuala chiah hi yellow card pek a ni a, ball chang let tura a thawhrim vang a ni a, goal 10 khung tawh striker hian goal venhim hna a thawh tel avangin Police tan chuan hlu tak a ni.
Republic Veng tlangval Valpuia'n match li chhung goal a khung tawh a, Police forward hian MPL6-ah goal 9 khung tawhin a kawppui Fakzuala chiah a pha lo. Police tlarhma an hriam tih hmuh hmaih rual a ni lo a, midfield-a V. Lalṭanpuia inpekna sawi hmaih a thiang lo bawk.
Dinhmun ṭha Police
Mizoram Police coach Lalbiaksanga Colney chuan, "Lungleiah khan hun tawp dawnah kan goal kan khung a, kan draw hram. Tun ṭumah pawh a danglam lo a, kan vannei takzet a ni," tiin first leg-a an inhnehtawk thei chu a lawm thu a sawi.
Second leg tur thlirin BS-a Colney chuan, "Masih ven dan tur kan hre tawh ang, set piece-a goal hnih kan chhuah kha a dik lo. Aizawl FC hian I League khel turin Kolkata an pan dawn a, keini kan lo hahdam thei dawn. Chuvangin keini hi dinhmun ṭha zawk tur kan ni," tiin final thlen a beisei thu a sawi.
Nizan khan semifinal hnuhnung zawkah Chhinga Veng leh Chanmari FC te an inkhel a, result kan hre hman lo.
Aizawl FC coach Paulo Meneses chuan, "Referee te hian ka player-te hi min humhalh sak tawk lo a, hei hi chu insiamṭhat an mamawh a ni," tiin Police khelh dan hmang chu a helh thu a sawi a, inkhelh banah AFC ṭantute hnehah final thlen ngei a inbeisei thu a sawi bawk.