Poch-a'n goal khung hnem beisei

Tottenham Hotspur manager Mauricio Po­chettino chuan zanin dar 8:30-a West Brom nen an inkhelh turah hnehna an chan ngei a beisei thu a sawi a, Wembley-ah an theihna tak an lantir chhunzawm theih a beisei thu a sawi bawk.

White Hart Lane siamṭhat mek a nih avangin Tottenham hian an khel­mual atan Wembley Sta­dium an hmang hawh a, England-a stadium hming­thar berte zinga miah hian an khelmual hmasa aiin goal khung an harsat.

Mipui 90,000 lenna Wembley-ah hian Premier League champion lai Chelsea an ngam lo a, Burnley leh Swansea te an inhnehtawkpui bawk. Mahse, Liverpool an sawp hnuah Bournemouth leh Crystal Palace te an hneh zui leh tawh; inrintawkna an nei leh tawh ang.

Spurs manager Po­che­ttino chuan, "A nih­na takah chuan kan khel­mualah ngei hun harsa kan hmang tih kha zep tur a awm lo. A bik takin kan khingpuite goal bulah kan hriam tawk lo deuh ṭhin a, dawhthei taka kan nghah a ngaih chang a awm a ni," tiin a sawi.

Tottenham mikhual tur West Brom hi an manager Tony Pulis ban hlim an ni. Pulis kaih­hruaina hnuaiah khan Premier League match 12 khelhah vawi hnih chiah chak ni hmel an hmu a, zanin hian manager lailawk Gary Megson kaihhruaina hnuaiah an khel dawn.

Team pahnih te season hmasa a an intawn ṭumin Tottenham hian si li faiin hnehna an chang, mah se inchhuang tur erawh an la ni bik lo ang; an intawn hnuhnung vawi kuaah vawi hnih chiah hnehna an chang, ṭum ruk dang chu an inhnehtawk a ni.

Argentine manager Poch chuan inkhel tur thlir­lawkin, "Albion player-te hian tharum an ngah a, a bik takin set piece-ah an hlauhawm hle bawk. Skills bakah thahrui kan neih ṭhat a ngai dawn a, mahni inveng tak chungin goal tam zawk khung kan tum ang," a ti. Poch hian counter attack an hman tur thu a sawi bawk.