Champhaiin semifinal an lut
Champhai Chhangphut Field-a 13th Sub Junior Inter District Football Championship neih mek chu nimin khan khelh chhunzawm a ni a, inelna thlengtu Champhai chuan 2-1 a Lunglei hnehin semifinal an lut. An match hmasa bera Mamit sawptu Lunglei erawhin semifinal luh beiseina nei turin vawiin chawhnu dar 12:30-a Lawngtlai an hmachhawn hunah hnehna an chan a ṭul ang.
Lunglei laka an mualpho hnuah Mamit pawh an insiamṭha ve nghal a, semifinal luh beiseina nei turin Lawngtlai chu 1-0 in an hneh - vawiinah a thlengtu Champhai an hneh chuan semifinal an lut dawn a ni.
Semifinal lut chiang tawh Kolasib-in hnehna chang turin harsatna an tawk lo a, Serchhip chu 4-0 ngawtin an sawp. Serchhip hian match thum an khelhah chak hmel an hmu miah lo - goal 10 chhuahin goal khat chiah an khung.
Nimin Inkhel Result
Mamit 1 - 0 Lawngtlai
MAM: Dennis Lalrinchhana 20'
Champhai 2 - 1 Lunglei
CHA: Lalrinpuia 55'; T.L. Zamawia 65'
LUN: Aron Vanlalrinchhana 38'
Kolasib 4 - 0 Serchhip
KOL: Lawmzuala 15',26'; H. Vanlalhruaia 22',31'
Vawiin Inkhel Tur
10:30 AM Aizawl vs Siaha