Barcelona hmaah 'rin loh' Valencia
February 2016 khan Copa del Rey first leg-ah Barcelona chuan 7-0 ngawtin Valencia an sawp a, Spanish chanchinbu lar Marca-in headline atana an hman chu "Goal sarih leh in vui liamna" tih a ni a, Valencia chu tho tawh lo tura thlah liam an nih thu an ziak.
Superdeporte chuan "Beidawnthlak" tiin an ziak kuau a, khatah chiah khan a ni team talbuai mek Valencia khai chhuak turin Gary Neville a tling tawk lo tih khawvelin a hriat ni. Thla 21 a liam a, tunah chuan Valencia-in La Liga-ah pahnihna dinhmun an luah mek a, an chunga awm chu Barcelona an ni - Pathianni zan dar 1:15-ah team pahnih hi an inhmachhawn dawn a, Valencia-in hnehna an chang a nih chuan point khat chauhin Barca an thlau tawh ang.
Bul ṭantu Alemany
Valencia-in league match 12 an khelh tawhah vawi kua hnehna changin vawi thum an khingpui an inhnehtawkpui a, tlawm hmel an la hmu lo. An mikhual tur Barcelona hi anmahni ang thoa tlawm hmel la hmu lo an ni a, Pathianni zan inkhel a hmuhnawm dawn tih hai rual a ni lo. Tun hnaia Valencia harhtharnaah club general director Mateu Alemany leh coach Marcelino Garcia Toral chu fak rawn an ni.
Real Mallorca president hlui Alemany hi Real Madrid president Florentino Perez-a'n Spanish club lian enkawl puiah lo sawm tawh mah se Mallorca president nih thlangtu a ni a, 2003 khan Spanish Cup nomawi a chawipui hial. March 2016 khan Valencia a pan a, insiamṭhat nana an mamawh ber chu coach ṭha a ni tih a hria a, a chhanna chu La Liga-a Villarreal hruai let a, kum thum chhung a zawna top six-a awmpui theitu Marcelino a ni.
Chhandamtu Marcelino
Villarreal ban hnu Marcelino-a'n Inter Milan inbiakna neihpui hman mah se Valencia lam a pan a, Spanish club-in a mamawhte pek an tiam avanga Valencia tluchhe tawh tungding tura kal a ni. Player 14 ngawt a chhuah zalen a, French midfielder Geoffrey Kondogbia, Colombian defender Jeison Murillo leh goalkeeper Norbeto Neto te a lalut thung - an chet ṭhat nana player pawimawh vek an ni.
Marcelino hmaa thla ruk lo khel tawh Simone Zaza-a'n a pu thar hnuaiah harhna a chang bawk a, match 11-ah goal kua a khung tawh - Lionel Messi chiah a tluk lo. Valencia boss Marcelino hian a player-te chu club chhungkuaa hnathawk, hmun phiat aṭanga an pu ber thlenga zah taka be vek turin a zirtir a, uluk takin an diet nen lam a enpui a, chhungkaw lungrual tak anga awm chu a naute a zirtir a ni - thawh hona ṭha, inlungrualna leh hmangaihna ṭangkhawm hi Barcelona-in an chhuk en thei dawn em tih chu Pathianni zanah a hriat ang.
Zanin Inkhel Tur
Deportivo Alaves 5:30 PM Eibar
Real Madrid 8:45 PM Malaga
Real Betis 11:00 PM Girona
Levante 1:15 AM Atletico Madrid
November 26, Pathianni
Deportivo 4:30 PM Athletic Club
Real Sociedad 8:45 PM Las Palmas
Villarreal 11:00 PM Sevilla
Valencia 1:15 AM Barcelona
November 27, Thawhtan zan
Espanyol 1:30 AM Getafe